​ក្រសួងការពារជាតិ​អាមេរិក បានចាប់ផ្តើម​បញ្ជូន​ទិន្នន័យ​ផ្កាយរណប និង​ឧបករណ៍​ចាប់​សញ្ញា​តាម​ពេលវេលា​ជាក់ស្តែង​ទៅ​អាជ្ញាធរ​របស់​ប្រទេស​កាណាដា កាលពី​ថ្ងៃ​សុក្រ (​ទី​១៦ ខែមិថុនា​) ជា​បច្ចេកវិទ្យា ដែល​ខ្លួន​បាន​ប្រាប់ថា នឹង​ជួយ​កំណត់​អត្តសញ្ញាណ​កន្លែង​ភ្លើង​ឆេះ​ថ្មី​បាន​លឿន​ជាង​មុន ខណៈដែល​ប្រទេស​នោះ ត្រូវ​ស៊ូទ្រាំ​នឹង​ការបំផ្លិចបំផ្លាញ​មួយ​ក្នុងចំណោម​ការបំផ្លិចបំផ្លាញ​ដ៏​ធំ​បំផុត​នៃ​រដូវ​កាល​ភ្លើង​ឆេះ​ព្រៃ​ដំ​ដែល​កើតមាន​យ៉ាង​ឆាប់​នៅ​ប្រទេស​នេះ​។​

​សហរដ្ឋអាមេរិក​បាន​បញ្ជូន​អ្នក​ពន្លត់​អគ្គិភ័យ​ជាង ៦០០​នាក់​ទៅ​កាណាដា​រួចហើយ ដើម្បី​ជួយ​ពន្លត់ភ្លើង​។​ប្រធានាធិបតី​អាមេរិក លោក​ចូ បៃ​ដិ​ន (Joe Biden) ដែល​បាន​ភ្ជាប់​ចំហេះ​ព្រៃ​ទៅនឹង​បម្រែបម្រួល​អាកាសធាតុ បាន​និយាយថា មន្ត្រី​អាមេរិក​កំពុង​តាមដាន​មើល​គុណភាព​ខ្យល់ និង​ការពន្យារពេល​ការហោះហើរ​។​

​អ្នកនាំពាក្យ​ក្រុមប្រឹក្សាសន្តិសុខ​ជាតិ​អាមេរិក លោក Adam Hodge បាន​ឲ្យ​ដឹង នៅក្នុង​សេចក្ដីថ្លែងការណ៍​ថា​៖ «​ចាប់ពី​ថ្ងៃនេះ​ទៅ បុគ្គលិក​ក្រសួងការពារជាតិ (DOD) នឹង​វិភាគ និង​ចែករំលែក​ទិន្នន័យ​តាម​ពេលវេលា​ជាក់ស្តែង ដែល​បាន​ទាញយក​មកពី​ផ្កាយរណប និង​ឧបករណ៍​ចាប់​សញ្ញា​របស់​សហរដ្ឋ​អាមេរិក ហើយ​ផ្ទេរ​ទិន្នន័យ​នោះ តាមរយៈ​កិច្ចព្រមព្រៀង​សហប្រតិបត្តិការ រវាង​មជ្ឈមណ្ឌល​អគ្គិភ័យ​អន្តរ​ភ្នាក់ងារ​ជាតិ​អាមេរិក និង​មជ្ឈមណ្ឌល​ចំហេះ​ព្រៃ​អន្តរ​ភ្នាក់ងារ​ជាតិ​កាណាដា​»​។

​ជាមួយគ្នានេះ លោក Hodge បាន​បន្ថែមថា រដ្ឋបាល​របស់លោក​បៃ​ដិ​ន (Biden) ក៏​កំពុង​បញ្ជូន​បន្ថែម​នូវ​បុគ្គលិក​របស់​ក្រសួងមហាផ្ទៃ​អាមេរិក (DOI) ទី​ភ្នា​ក់​គ្រប់គ្រង​ព្រៃឈើ USDA (USFS) ព្រមទាំង​បុគ្គលិក និង​ឧបករណ៍​ពន្លត់ភ្លើង​ឆេះ​ព្រៃរបស់​រដ្ឋ​ទៅកាន់​ប្រទេស​កាណាដា​។​

​សូមបញ្ជាក់ថា ប្រទេស​កាណាដា​កំពុង​ទទួលរង​នូវ​ការបំផ្លិចបំផ្លាញ​ដ៏​បំផុត ដោយសារ​រដូវ​កាល​ភ្លើង​ឆេះ​ព្រៃ ដោយ​ផ្ទៃដី​ប្រហែល ៤,៨​លាន​ហិកតា ត្រូវបាន​ឆេះ​រួចហើយ ដែល​ផ្ទៃដី​នេះ មាន​ទំហំ​ធំ​ជាង​ប្រទេស​ហូ​ឡង់​ទៅទៀត​៕​