អាជ្ញាធរយោធាបណ្ដោះអាសន្នរបស់ប្រទេសម៉ាលី កាលពីថ្ងៃសុក្រ ទី១៦ ខែមិថុនា បានស្នើសុំឱ្យកងកម្លាំងរក្សាសន្តិភាពរបស់អង្គការសហប្រជាជាតិ ចាកចេញពីប្រទេសអាហ្វ្រិកខាងលិច «គ្មានការពន្យាពេល» ដោយលើកឡើងពី វិបត្តិនៃទំនុកចិត្តរវាងអាជ្ញាធរប្រទេសម៉ាលី និងបេសកកម្មរបស់អង្គការសហប្រជាជាតិរយៈពេលមួយទសវត្សរ៍ ដែលគេស្គាល់ថា MINUSMA ។ វាបង្ហាញពីរបត់ប្រែប្រួលដ៏សំខាន់មួយសម្រាប់ប្រទេសម៉ាលី ដែលបានពុះពាដើម្បីទប់ស្កាត់ការបះបោរអ៊ីស្លាមនិយមដែលបានចាក់ឫសបន្ទាប់ពីការបះបោរឆ្នាំ ២០១២។
បេសកកម្មរបស់អង្គការសហប្រជាជាតិរយៈពេលមួយទសវត្សរ៍ ត្រូវបានដាក់ពង្រាយដោយក្រុមប្រឹក្សាសន្តិសុខអង្គការសហប្រជាជាតិក្នុងឆ្នាំ២០១៣ ដើម្បីគាំទ្រដល់កិច្ចខិតខំប្រឹងប្រែងបរទេស និងក្នុងតំបន់ដើម្បីស្ដារស្ថិរភាព។
ការខកចិត្តចំពោះភាពអសន្តិសុខដែលកំពុងកើនឡើង បានបង្កឱ្យមានរដ្ឋប្រហារចំនួនពីរនៅក្នុងប្រទេសម៉ាលីក្នុងឆ្នាំ ២០២០ និង ២០២១ ហើយរបបយោធាដែលកំពុងកាន់អំណាចកំពុងមានការខ្វែងគំនិតគ្នាកាន់តែខ្លាំងឡើងជាមួយបេសកកម្មរបស់អង្គការសហប្រជាជាតិ MINUSMA និងសម្ព័ន្ធមិត្តអន្តរជាតិផ្សេងទៀតរួមទាំងប្រទេសបារាំងផងដែរ។ រដ្ឋមន្ត្រីក្រសួងការបរទេសម៉ាលី លោក Abdoulaye Diop បាននិយាយទៅកាន់ក្រុមប្រឹក្សាដែលមានសមាជិក ១៥ ប្រទេសកាលពីថ្ងៃសុក្រថា «ដោយគួឲ្យសោកស្តាយ បេសកកម្មរបស់អង្គការសហប្រជាជាតិ MINUSMA ហាក់ដូចជាបានក្លាយជាផ្នែកមួយនៃបញ្ហាដែលជំរុញឱ្យមានភាពតានតឹងអន្តរសហគមន៍កាន់ពុះកញ្ជ្រោលឡើង។
លោកនិយាយថា ស្ថានភាពនេះកំពុងចាប់ផ្តើមការមិនទុកចិត្តក្នុងចំណោមប្រជាជនម៉ាលី ហើយកំពុងបណ្តាលឱ្យមានវិបត្តិទំនុកចិត្តរវាងអាជ្ញាធរប្រទេសម៉ាលី និងបេសកកម្មរបស់អង្គការសហប្រជាជាតិ MINUSMA។
រដ្ឋាភិបាលប្រទេសម៉ាលីស្នើឱ្យដក បេសកកម្មរបស់អង្គការសហប្រជាជាតិ MINUSMA ដោយមិនពន្យារពេល។ សមាជិកក្រុមប្រឹក្សាសន្តិសុខត្រូវតែអនុម័តសេចក្តីសម្រេចដើម្បីបន្តអាណត្តិសម្រាប់បេសកកម្មរបស់អង្គការសហប្រជាជាតិ MINUSMA នៅត្រឹមថ្ងៃទី ៣០ ខែមិថុនា។ សេចក្តីសម្រេចទាមទារយ៉ាងតិចប្រាំបួនសំឡេងឆ្នោតក្នុងការគាំទ្រ និងពុំមានការប្រើប្រាស់សិទ្ធិវ៉េតូដោយប្រទេសរុស្ស៊ី ចិន សហរដ្ឋអាមេរិក អង់គ្លេស ឬបារាំងដើម្បីអនុម័ត។
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
