ប្រព័ន្ធផ្សព្វផ្សាយរដ្ឋចិន CCTV បានរាយការណ៍ថា ប្រធានាធិបតីចិនលោក ស៊ី ជីងពីង (Xi Jinping) បានជួបជាមួយលោក ប៊ីល ហ្គេត (Bill Gates) នៅទីក្រុងប៉េកាំងរបស់ប្រទេសចិន កាលពីថ្ងៃសុក្រ (ទី១៦ ខែមិថុនា)។

ក្នុងជំនួបមួយ នៅឯផ្ទះសំណាក់រដ្ឋ Diaoyutai (ទាវយូថៃ) ក្នុងទីក្រុងប៉េកាំង ជាកន្លែងដែលមេដឹកនាំរបស់ប្រទេសចិន បានធ្វើបដិសណ្ឋារកិច្ចដល់ភ្ញៀវបរទេសជាន់ខ្ពស់ជាប្រវត្តិសាស្ត្រ លោកស៊ី (Xi) បានហៅលោកប៊ីល ហ្គេត (Bill Gates) ថា «មិត្តចាស់» និងបាននិយាយថា លោកសង្ឃឹមថា ឥស្សរជនទាំងពីរ អាចអនុវត្តសកម្មភាពរួមគ្នាដែលមានប្រយោជន៍ទាំងសម្រាប់ប្រទេសចិន និងសហរដ្ឋអាមេរិក។

លោកស៊ី (Xi) បាននិយាយទៅកាន់សហស្ថាបនិកក្រុមហ៊ុនMiccrosoft និងជាសប្បុរសជនថា លោកមានក្ដីរីករាយណាស់ ដែលបានជួបគ្នាម្ដងទៀតបន្ទាប់ពីរយៈពេលបីឆ្នាំ និងបានហៅលោកហ្គេត (Gates) ថា ជាមិត្តអាមេរិកដំបូង ដែលលោកបានជួប ក្នុងឆ្នាំនេះ។ ការជួបគ្នាលើកចុងក្រោយ រវាងលោកស៊ី (Xi) និងលោកហ្គេត Gates គឺនៅក្នុងឆ្នាំ២០១៥ ដែលជំនួបនោះធ្វើឡើងនៅខាងក្រៅវេទិកាBoao (ប៉ូអាវ) ក្នុងខេត្តហៃណាន (Hainan)។

នៅដើមឆ្នាំ២០២០ លោកស៊ី (Xi) បានសរសេរលិខិតផ្ញើទៅកាន់លោកហ្គេត (Gates) ដោយអរគុណចំពោះលោក និងមូលនិធិ Bill & Melinda Gates សម្រាប់ការសន្យាផ្តល់ជំនួយដល់ប្រទេសចិន ដោយក្នុងនោះរួមទាំងទឹកប្រាក់ ៥លានដុល្លារ ដែលជាជំនួយដល់ការប្រយុទ្ធប្រឆាំងនឹងជំងឺ COVID-19។

ចំណែកលោកហ្គេត (Gates) ដែលបានលាឈប់ពីក្រុមប្រឹក្សាភិបាលរបស់ក្រុមហ៊ុន Microsoft ក្នុងឆ្នាំ២០២០ ដើម្បីផ្តោតលើការងារមនុស្សធម៌ និងដែលបានធ្វើដំណើរទៅដល់ទីក្រុងប៉េកាំង កាលពីថ្ងៃពុធនោះ បានប្រាប់លោកស៊ី (Xi) ថា លោកមានកិត្តិយសណាស់ដែលមានឱកាសជួបគ្នានេះ។

យោងតាមប្រភពពីរ ដែលដឹងពីការពិភាក្សានេះ បានឲ្យដឹងថា លោកស៊ី (Xi) ក៏បានពិភាក្សាអំពីការកើនឡើងជាសកលរបស់បញ្ញាសិប្បនិមិត្ត (AI) ជាមួយលោកប៊ីល ហ្គេត (Bill Gates) និងប្រាប់ថា លោកស្វាគមន៍ក្រុមហ៊ុនអាមេរិក រួមទាំងក្រុមហ៊ុន Microsoft ដែលនាំយកបច្ចេកវិទ្យា AI របស់ខ្លួនមកកាន់ប្រទេសចិន ហើយប្រភពមួយទៀតបាននិយាយថា ការពិភាក្សាក៏ផ្ដោតលើការអភិវឌ្ឍន៍អាជីវកម្មរបស់ក្រុមហ៊ុន Microsoft នៅចិនផងដែរ៕