ក្រុមការងារថ្នាក់ជាតិចុះមូលដ្ឋាន ខណ្ឌទួលគោក រាជធានីភ្នំពេញ សហការជាមួយមន្ទីរពេទ្យ​ព្រះអង្គឌួង នៅថ្ងៃទី១៨ខែមិថុនានេះ បន្តរៀបចំកម្មវិធីចុះពិនិត្យ និងព្យាបាល​ជំងឺភ្នែក​ជូន​ប្រជាពលរដ្ឋ​ដោយ​ឥតគិតថ្លៃ និងការចាក់វ៉ាក់សាំងបង្ការជំងឺកូវីដ-១៩ ជូនពលរដ្ឋរស់​នៅ​សង្កាត់​ទឹក​ល្អក់​ទី៣ សង្កាត់ផ្សារដើមគរ និងសង្គាត់បឹងសាឡាង ស្ថិតនៅខណ្ឌទួលគោក រាជធានី​ភ្នំពេញ។

កម្មវិធីនេះ អញ្ចើញចូលរួមដោយឯកឧត្តម សុត ធា ប្រធាន​ក្រុមការងារគណបក្សចុះមូលដ្ឋាន​សង្កាត់​ផ្សារ​ដើមគរ តំណាងដ៏ឯកឧត្តមកិត្តិនីតិកោសលបណ្ឌិត ទេសរដ្ឋមន្រ្តី ឱម យ៉ិនទៀត ប្រធាន​ក្រុមការងារថ្នាក់ជាតិចុះជួយមូលដ្ឋានខណ្ឌទួលគោក លោក ជា ពិសី អភិបាល​ខណ្ឌ​ទួលគោក និងថ្នាក់ដឹកនាំជាច្រើនរូបទៀតផងដែរ។

នៅក្នុឱកាសនោះ ឯកឧត្តម សុត ធា មានប្រសាសន៍ថា តាំងនាមតំណាង ឯកឧត្តម​កិត្តិនីតិ​កោសល បណ្ឌិតទេសរដ្ឋមន្រ្តី ឱម យ៉ិនទៀត សូមថ្លែង​អំណរ​គុណ​ដល់​ក្រុម​គ្រូពេទ្យ​នៅ​មន្ទីរ​ពេទ្យ​ព្រះអង្គ​ឌួង ដែលបានចំណាយពេលវេលា នៅថ្ងៃឈប់សម្រាក ចុះពិនិត្យ​ និង​ព្យាបាល​ជំងឺ​ជូន​ពលរដ្ឋ​នៅ​មូលដ្ឋានខណ្ឌទួលគោក។ លើសពីនេះ ឯកឧត្តមបានអំពាវនាវដល់ប្រជាពលរដ្ឋ បន្ត​គាំទ្រ​ការ​ដឹកនាំរបស់គណបក្សប្រជាជនកម្ពុជា ដើម្បីប្រទេសជាតិមានការអភិវឌ្ឍ និងប្រជា​ពលរដ្ឋ​រស់​នៅ​ក្នុងភាពសុខស្រួល ក្រោមម្លប់សន្តិភាព។

ជាមួយគ្នានេះ ប្រជាពលរដ្ឋ បានលើកឡើងដែរថា នៅពេលមានក្រុមគ្រូពេទ្យចុះមកពិនិត្យ និង​ព្យាបាល​ជំងឺដោយឥតគិតថ្លៃ ដល់មូលដ្ឋានរស់នៅនេះ គឺផ្តល់ភាព​ងាយ​ស្រួល​មិន​ពិបាក​ធ្វើ​ដំណើរ​ទៅ​រក​ពេទ្យ និងកាត់បន្ថយការចំណាយបានមួយកំរិតទៅលើថ្នាំពេទ្យផងដែរ។លើសពីនេះ ពួកគាត់បានបង្ហាញអារម្មណ៍សប្បាយចិត្ត និងអរគុណដល់ក្រុមការងារចុះមូលដ្ឋាន ព្រមទាំង​ក្រុម​គ្រូ​ពេទ្យ ដែលបានចុះពិនិត្យសុខភាពនាពេលនេះ និង​បន្ត​បោះ​ឆ្នោត​គាំទ្រ​គណបក្ស​ប្រជាជនកម្ពុជា ដែលតែងគិតគូរពីសុខទុក្ខប្រជាពលរដ្ឋ និងប្រទេសជាតិគ្រប់កាលៈទេសៈ។

រាជរដ្ឋាភិបាល ក្រោមការដឹកនាំពីគណបក្សប្រជាជនកម្ពុជា តែង​តែ​យក​ចិត្ត​ទុក​ពី​សុខ​ទុក្ខ​ប្រជាពលរដ្ឋ​គ្រប់​កាលៈទេសៈ។ ដោយការមើលឃើញ ពីការយកចិត្តទុក និងស្នាដៃជាច្រើន​របស់​គណបក្ស​ប្រជាជនកម្ពុជា ទើបប្រជាពលរដ្ឋខ្មែរ ផ្តល់ទំនុកចិត្តបោះឆ្នោត​គាំទ្រ​គណបក្ស​ប្រជាជន​កម្ពុជា ដឹកនាំរាជរដ្ឋាភិបាល ក្នុងរយៈពេល៦អាណិត្តកន្លងទៅ ហើយបន្ត​គាំទ្រ​នៅ​អាណត្តិ​ទី៧​នេះ​ និងអាណត្តិក្រោយៗទៀតផងដែរ៕ អត្ថបទ៖ ទូច សោភ័ណ