កាលពីថ្ងៃសៅរ៍ម្សិលមិញ ប្រធានាធិបតីរុស្ស៊ីលោក Vladimir Putin បានផ្តល់ឲ្យក្រុមមេដឹកនាំ​អាហ្វ្រិក​ដែលព្យាយាមសម្រុះសម្រួលនៅក្នុងសង្រ្គាមអ៊ុយក្រែន នូវបញ្ជី​ហេតុផល​ដែល​លោក​ជឿថា​ សំណើ​ជាច្រើនរបស់ពួកគេពុំត្រឹមត្រូវ ដែលជាផែនការមួយ ត្រូវបាន​ច្រាន​ចោល​រួច​ទៅ​ហើយ​ដោយ​ទីក្រុងគីវ ។  

ក្រុមមេដឹកនាំអាហ្វ្រិក បានព្យាយាមស្វែងរកកិច្ចព្រមព្រៀងលើវិធានការបង្កើតជំនឿចិត្តជាច្រើន បើទោះបីជាកាលពីសប្តាហ៍មុន ទីក្រុងគីវ ចាប់ផ្តើមវាយបក​ដើម្បី​រុញ​ច្រាន​កង​កម្លាំង​រុស្ស៊ី​ចេញ​ពី​តំបន់​ភាគ​ខាងត្បូង និងតំបន់ភាគខាងកើតអ៊ុយក្រែន ដែលទីក្រុងម៉ូស្គូកាន់កាប់ក៏ដោយ ។ 

ប្រធានាធិបតីអ៊ុយក្រែនលោក Volodymyr Zelensky និយាយ​ក្រោយ​ជំនួប​ជា​មួយ​ពួក​គេ​នៅ​ក្នុង​ទីក្រុង​គីវ​កាលពីថ្ងៃសុក្រថា កិច្ចពិភាក្សា​ស្វែង​រកសន្តិភាព​ត្រូវតែ​ឲ្យ​ទី​ក្រុង​ម៉ូស្គូ​ដក​កង​កម្លាំង​របស់​ពួក​គេចេញពីតំបន់កាន់កាប់លើទឹកដីអ៊ុយក្រែន គឺជាអ្វីមួយដែលរុស្ស៊ីនិយាយថា វាមិន​អាច​ចរចា​បាន​នោះ​ទេ ។ 

កាលពីថ្ងៃសៅរ៍ម្សិលមិញ លោក Putinបានបើក​កិច្ច​ប្រជុំជា​មួយ​ក្រុម​អ្នក​តំណាង​មក​ពី​ប្រទេស​សេណេហ្គាល់ អេហ្ស៊ីប ហ្សំប៊ី អ៊ុយហ្គង់ដា សាធារណរដ្ឋប្រជាធិបតេយ្យកុងហ្គោ ប្រជុំកោះ​កូម៉ូរ៉ុស និងអាហ្វ្រិកខាងត្បូង នៅក្នុងវិមានជិតទីក្រុង St. Petersburg ដោយ​លោក​បាន​ធ្វើ​ការ​សង្កត់​ធ្ងន់​ពីការប្តេជ្ញាចិត្តរបស់រុស្ស៊ីចំពោះទ្វីបមួយនេះ៕ អត្ថបទ៖ សារ៉ាត់