នៅថ្ងៃអាទិត្យនេះ រដ្ឋមន្រ្តីការបរទេសសហរដ្ឋអាមេរិកលោក Antony Blinken បានធ្វើដំណើរ​មក ដល់​សណ្ឋាគារនៅទីក្រុងប៉េកាំង មុនជំនួបជាមួយក្រុមមេដឹកនាំកំពូលៗរបស់ចិន ។ 

អំឡុងដំណើរទស្សនកិច្ចរយៈពេល ២ថ្ងៃចាប់ពីថ្ងៃទី ១៨ ដល់ថ្ងៃទី ១៩ខែមិថុនារបស់លោក គេ​បាន​រំពឹងថា លោក Blinken នឹងជួបជាមួយរដ្ឋមន្រ្តីការបរទេសចិនលោក Qin Gang មន្រ្តីការទូត​ជាន់​ខ្ពស់​ចិន លោក Wang Yi ហើយនឹងអាចជួបជាមួយប្រធានាធិបតីចិនលោក Xi Jinping ។ 

បន្ទាប់ពីពន្យាពេលដំណើរទស្សនកិច្ចកាលពីខែកុម្ភៈ ក្រោយបាឡុងចារកម្មចិនហោះលើ​ដែន​អាកាស​សហរដ្ឋអាមេរិក លោក Blinken បានក្លាយ​ជា​មន្រ្តីការទូត​ជាន់ខ្ពស់​លើក​ដំបូង​របស់​សហរដ្ឋ​អាមេរិក បំពេញទស្សនកិច្ចនៅចិនក្នុងរយៈពេល៥ឆ្នាំកន្លងមកនេះ ។ 

ដំណើរទស្សនកិច្ចនេះដែរ បានកើតឡើង ស្របពេលមានទំនាក់ទំនងទ្វេភាគីជាប់គាំង ហើយ​និង​ការ​រំពឹង​ទុក​តិចតួច​លើ​ការ​ទម្លុះ​ភាព​ទាល់ច្រក​ នៃ​ជម្លោះ​រវាង​ប្រទេស​មហា​អំណាច​សេដ្ឋកិច្ច​បំផុត​ទាំង​២ របស់ពិភពលោកមួយនេះ៕ អត្ថបទ៖ សារ៉ាត់