ក្រុមអាជ្ញាធរ និយាយថា នគរបាល ១២នាក់ បានរងរបួសកាលពីថ្ងៃសៅរ៍ អំឡុង​ការ​ប៉ះ​ទង្គិច​គ្នា​ជាមួយ​ក្រុម​បាតុករនៅក្នុងតំបន់ Savoie ប្រទេសបារាំង ជាទីដែលបាតុកម្ម​ប្រឆាំង​នឹង​គម្រោង​ផ្លូវ​ដែក​ល្បឿន​លឿន នៅតំបន់ភ្នំ Alpsប្រែក្លាយជាអំពើហិង្សា ។ 

ក្រុមបាតុករប្រហែល ២ពាន់នាក់ បានជួបជុំគ្នានៅជ្រលងភ្នំ Maurienne(ម៉រីយែន) ដើម្បី​ប្រឆាំង​នឹង​គម្រោង​ផ្លូវ​ដែក​ដែលតភ្ជាប់រវាងទីក្រុង Lyon(លីយ៉ុង) ប្រទេសបារាំង និងទីក្រុង Turin របស់​ប្រទេសអ៊ីតាលី។ 

លោក Francois Ravier គឺជាមន្រ្តីក្នុងស្រុកមួយរូប និយាយនៅក្នុងសន្និសីទសារព័ត៌មានថា ពួក​គេ​បាន​ចោល​ដុំថ្ម​លើ​ក្រុម​នគរបាល​បង្រ្កាប​កុបកម្ម​ដែល​បាន​ឆ្លើយតប​វិញ​ជា​មួយ​នឹង​ការ​បាញ់​​ឧស្ម័ន​បង្ហូរ​ទឹកភ្នែក ហើយបាតុករម្នាក់ បានរងរបួស ។ 

លោកបន្តថា ការធ្វើបាតុកម្មនៅមិនទាន់ចប់ទេ ហេតុដូច្នេះហើយពួកយើងនៅតែប្រុងប្រយ័ត្នខ្ពស់ និង​ចល័តកម្លាំង ហើយវត្តមានរបស់កងកម្លាំងសន្តិសុខ នឹងបន្តពេញមួយយប់ ។ 

រដ្ឋមន្រ្តីក្រសួងមហាផ្ទៃបារាំងលោក Gerald Darmanin (ហ្សេរ៉ាល់ ដាម៉ាណាំង) បាន​និយាយ​ពី​ចំនួន​​នគរបាលរងរបួស នៅលើបណ្តាញព័ត៌មានសង្គម Twitter ។ 

ក្រុមមន្រ្តីនិយាយថា ការពិនិត្យព្រំដែន បានរកឃើញវត្ថុរឹងចំនួន ៤០០ ដូចជាកំាបិត និងញញួរ ខណៈ​មនុស្ស ៩៦នាក់ ដែលត្រូវបានស្គាល់ដោយកងកម្លាំងសន្តិសុខ ត្រូវបាន​បញ្ជូន​ទៅ​កាន់​ប្រទេស​អ៊ីតាលី​វិញ៕ អត្ថបទ៖ សារ៉ាត់