សមាគមបណ្តាញប្រជាជនកម្ពុជា បានបើកសន្និបាតពីការរៀបចំផែនការអភិវឌ្ឍសហគមទេសចរណ៍ លើកដំបូង ដើម្បីប្រមូលធាតុចូលលើការរៀបចំផែនការយុទ្ធសាស្ត្រ អភិរក្ស និង​អភិវឌ្ឍន៍​សហគមន៍​ទេសចរណ៍ អេកូទេសចរណ៍ និងទាក់ទាញទេសចរទស្សនានៅតំបន់នេះ។

ពិធីនេះធ្វើឡើងក្រោមអធិបតីភាព ឯកឧត្តម នី ផល្លី រដ្ឋលេខាធិការ​ក្រសួង​ទេសចរណ៍​រួម​នឹង​មន្រ្ដីរាជការ និងសហគមន៍ទេសចរណ៍ អេកូទេសចរណ៍ និងសហគមន៍នេសាទ សហគមន៍​ព្រៃឈើ​ជា​ដើម ជាសមាជិកចំនួន ៣៦រូប និងមានសហគមន៍មិនមែនជាសមាជិកចំនួនជាង ២០ សហគមន៍ទៀត បានចូលរួមនាថ្ងៃទី១៨ ខែមិថុនា នៅសហគមន៍នេសាទត្រពាំងសង្កែ ស្រុកទឹកឈូ ខេត្តកំពត ។

ឯកឧត្តម នី ផល្លី ថ្លែងថា សន្និបាតសហគមន៍លើកដំបូងនេះ នឹង​ប្រមូល​យក​ធាតុ​ចូល​ដែល​ជា​បញ្ហា​ប្រឈម​របស់​សហគមន៍យកទៅដោះស្រាយបន្ត និងប្រមូលយកបទពិសោធន៍ល្អនានា ពី​បណ្តា​សហគមន៍​ដែលបានអភិវឌ្ឍន៍ជោគជ័យ ក្នុងការគ្រប់គ្រង រៀបចំសហគមន៍ ឲ្យសហគមន៍​នានា​ទៀត​ យកជាគំរូតាម និងដាក់​បញ្ចូល​ក្នុង​ផែនការ​យុទ្ធសាស្ត្រ​សម្រាប់​អភិវឌ្ឍន៍​ឲ្យ​ក្លាយ​ជា​សហគមន៍​ទាក់​ទាញ​ទសចរទៅទស្សនា។

ឯកឧត្តមបន្តថា បច្ចុប្បន្នទំនោរភ្ញៀវទេសចរ គឺមានការចាប់អារម្មណ៍ និងចង់អញ្ជើញ​ទៅ​ទស្សនា​ខ្លាំង នៅតាមសហគមន៍ទេសចរណ៍ និងអេកូទេសចរណ៍នានា ដែល​បញ្ហា​នេះ​ទាមទារ​ឲ្យ​សហគមន៍​ទាំងអស់​ត្រូវរៀបចំកាយសម្បទាឲ្យបានល្អ ដូចជាការរៀបចំផ្ទះស្នាក់ អាហារដ្ឋាន ការ​ការពារ ថែរក្សា អភិរក្ស និងអភិវឌ្ឍន៍ធនធានធម្មជាតិ នៅក្នុងដែនសហគមន៍នោះឲ្យបានល្អ​ចៀស​​វាងការ​បរបាញ់សម្លាប់សត្វព្រៃ កាប់ព្រៃឈើ ការបំផ្លាញបរិស្ថានជាដើម៕ អត្ថបទ៖  ស៊ុម សុខជា