រូបភាពវីដេអូឃ្លីបថតបានដោយទីភ្នាក់ងារព័ត៌មានរ៉យទ័រ ឃើញទីក្រុង Sao Leopoldo(សាវ ឡេវប៉ូលឌូ)ទាំងមូលស្ថិតនៅរដ្ឋភាគខាងត្បូង Rio Grande do Sul(រីយ៉ូ ក្រែន​ឌូស៊ូល) របស់​ប្រទេស​ប្រេស៊ីល រងការជន់លិចទាំងស្រុង ក្រោយការវាយប្រហារដោយព្យុះស៊ីក្លូន កាលពី​រយៈ​ពេល ១ថ្ងៃមុន ។ 

យោងតាមការអះអាងរបស់ក្រុមអាជ្ញាធររដ្ឋ បានឲ្យដឹងថា មនុស្សយ៉ាងហោច ១១នាក់ បាន​ស្លាប់​នៅ​ក្នុងរដ្ឋ Grande do Sul ។  

រដ្ឋបាលរដ្ឋ បាននិយាយនៅក្នុងការបញ្ចេញព័ត៌មានថា ព្យុះស៊ីក្លូន បណ្តាលឲ្យមានភ្លៀងធ្លាក់ខ្លាំង ហើយការរុករករបស់ឧទ្ធម្ភាគចក្រ បានចាប់ផ្តើមនៅតាមតំបន់ដែលរងការជន់លិច ដើម្បី​ស្វែង​រក​មនុស្ស ២០នាក់ផ្សេងទៀត ដែលបានបាត់ខ្លួន ។ 

លោក Eduardo Leite គឺជាអភិបាលរដ្ឋ Rio Grande do Sul បាននិយាយថា ក្រុម​អាជ្ញាធរ​បាន​ចុះ​ប្រតិបត្តិការជួយសង្រ្គោះ ២.៤០០លើក នៅក្នុងរយៈពេល ២ថ្ងៃចុងក្រោយនេះ ។ 

ប្រជាពលរដ្ឋនៅតំបន់រងផលប៉ះពាល់ បានសង់ទីជម្រកនៅតាមទីកន្លែងលេងកីឡា នៅ​ក្នុង​ទីក្រុង​របស់​ពួក​គេ ហើយក្រុមអាជ្ញាធរ បានចេញ​ការ​ព្រមាន​ផង​ដែរ​ពី​ហានិភ័យ នៃ​បំណាក់​ដី​នៅ​តាម​តំបន់​ជាច្រើន ។

សូមបញ្ជាក់ថា ទឹកជំនន់ស្លាប់មនុស្សនៅក្នុងប្រទេសប្រេស៊ីល បានក្លាយជារឿងធម្មតាទៅហើយ ហើយវាបណ្តាឲ្យមានការខូចខាតអស់រយៈពេលជាច្រើនទសវត្សរ៍មកហើយ ៕ អត្ថបទ៖ សារ៉ាត់