វិទ្យាស្ថានអន្តោប្រវេសន៍ជាតិ បាននិយាយនៅក្នុងសេចក្តីថ្លែងការណ៍កាលពីថ្ងៃសៅរ៍ថា ក្រុម​អាជ្ញាធរ​ម៉ិកស៊ិក បានរកឃើញ ជនអន្តោប្រវេសន៍ ១២៩នាក់ ដែលភា​គ​ច្រើន​នៃ​ពួក​គេ​មក​ពី​ប្រទេស​កាតេម៉ាឡា នៅក្នុងរថយន្តកុងតឺន័រមួយគ្រឿង ស្ថិតនៅរដ្ឋភាគខាងកើត Veracruz ។ 

ក្រុមជនអន្តោប្រវេសន៍ទាំងនេះ ត្រូវបានគេញាត់ចូលក្នុងរថយន្តកុងតឺន័រ ស្រប​ពេល​កើត​មាន​រលក​កម្តៅនៅ​ក្នុងប្រទេសម៉ិកស៊ិក ជាទីដែលសីតុណ្ហភាពខ្ពស់ជាងធម្មតា កើនឡើងដល់ ៤៥​អង្សាសេ នៅតាមបណ្តាលរដ្ឋជាច្រើន ដែលរួមទាំងរដ្ឋ Veracruz ផងដែរ ជា​កន្លែង​ដែល​ប្រតិបត្តិការ​បាន​ធ្វើឡើង ។ 

គួរឲ្យដឹងថា កាលពីចុងខែឧសភាកន្លងទៅ ក្រុមភ្នាកងារអន្តោប្រវេសន៍ បាន​រកឃើញ​ជន​អន្តោ​ប្រវេសន៍ ១៧៥នាក់ផ្សេងទៀត ដែលភាគច្រើននៃពួកគេមកពីអាមេរិកកណ្តាល នៅ​រដ្ឋភាគ​ខាង​ត្បូង Chiapas។ ចំណែកឯជនអន្តោប្រវេសន៍ ៣០០នាក់ផ្សេងទៀត ត្រូវ​បាន​បញ្ឈប់​ផង​ដែរ​នៅ​ប៉ុស្តិ៍​ត្រួត​ពិនិត្យស្ថិតនៅក្នុងរដ្ឋ Veracruz កាលពីខែមីនា ។ 

ជនអន្តោប្រវេសន៍ដែលរត់ភៀសខ្លួនចេញពីអំពើហិង្សា និងភាពក្រីក្រ​នៅ​អាមេរិក​ឡាទីន​ជា​ញឹក​ញាប់​បាន​បង់ប្រាក់ឲ្យក្រុមអ្នករត់ពន្ធមនុស្សខុសច្បាប់ ដើម្បីឆ្លងកាត់ព្រំដែនម៉ិកស៊ិក ចូលទៅក្នុង​ទឹកដី​សហរដ្ឋអាមេរិក ៕ អត្ថបទ៖ សារ៉ាត់