ព្រឹត្តិការណ៍យោគៈអន្តរជាតិ កំពុងជំរុញពង្រឹងទំនាក់ទំនងការទូតរវាងកម្ពុជា-ឥណ្ឌា កាន់​តែ​ខ្លាំង​ក្លា និងបានកំពុងជួយជំរុញ ព្រឹត្តិការណ៍ និងសកម្មភាពទេសចរណ៍, ទាក់ទាញភ្ញៀវទេសចរ និង​វិនិយោគិន​អន្តរជាតិ ឲ្យមកកម្ពុជាបណ្តាក់ទុនជាបន្តបន្ទាប់។

ឯកឧត្តម ជា កុសល រដ្ឋលេខាធិការក្រសួងទេសចរណ៍ លើកឡើងនៅក្នុង “ទិវា​យោគៈ​អន្តរជាតិ​លើកទី៩​” ​នៅពហុកីឡដ្ឋានជាតិអូឡាំពិក ថ្ងៃទី១៨ ខែមិថុនា ឆ្នាំ២០២៣នេះថា ជុំវិញ​ទិវា​យោគៈ​​នេះ ក្រសួងទេសចរណ៍សហការជាមួយស្ថានទូតឥណ្ឌា ប្រចាំនៅកម្ពុជា បាន​រៀបចំ​ទិវា​យោគៈ​អន្តរ​ជាតិ​ចាប់តាំងពីឆ្នាំ២០១៥ ដោយ​ទទួល​បាន​ជោគជ័យ​ដ៏​ធំធេង​ជា​ច្រើន​លើក​រួច​មក​ហើយ ដោយយោគៈផ្តល់អត្ថប្រយោជន៍យ៉ាងច្រើនដល់អ្នកហាត់គ្រប់វ័យ, យោគៈ គឺ​ជា​ផ្នែក​មួយ​នៃ​ការ​ធានារ៉ាប់​រងសុខភាព ការមានសុខភាពផ្លូវចិត្ត និងផ្លូវកាយដ៏ល្អប្រសើរ គឺមាន​សារៈ​សំខាន់​សម្រាប់​សន្តិភាព និងសុខដុមរមនាក្នុងខ្លួន សម្រាប់មនុស្សគ្រប់រូប សម្រាប់គ្រួសារ សហគមន៍ និង​សង្គម។ យោគៈគឺសម្រាប់ទាំងអស់គ្នា យោគៈត្រូវបានស្វាគមន៍ និង​អនុវត្ត​នៅ​ទូទាំង​ពិភព​លោក រួមទាំងប្រទេសកម្ពុជា ផងដែរ។

ទាក់ទិននឹងយោគៈនេះ ឯកឧត្តម​បាន​សូម​ថ្លែងអំ​ណរ​គុណ​យ៉ាង​ជ្រាល​ជ្រៅ​ចំពោះ​រដ្ឋាភិបាល នៃ​សាធារណៈ​រដ្ឋ​ឥណ្ឌា ជាពិសេសស្ថាន ទូតនៃប្រទេសឥណ្ឌា សម្រាប់កិច្ច​សហប្រតិបត្តិការ​ស្អិត​រមូត​នា​ពេល​កន្លងមកហើយ ឯកឧត្តម ក៏មានជំនឿជឿជាក់យ៉ាងមុតមាំថា លើស ពីអត្ថ​ប្រយោជន៍​សុខ​ភាព សម្រាប់មនុស្សជាតិ យោគៈ​មិន​ត្រឹម​តែ​ជួយ​ពង្រឹង​ទំនាក់​ទំនង​ការ​ទូត​រវាង​ប្រទេស​ទាំង​ពីរ​កម្ពុជា-ឥណ្ឌា ប៉ុណ្ណោះទេ គឺបានកំពុងជួយជំរុញព្រឹត្តិការណ៍ និង​សកម្មភាព​ទេសចរណ៍​, ទាក់ទាញភ្ញៀវទេសចរ និងវិនិយោគិនអន្តរជាតិ មកកម្ពុជា ជាបន្តបន្ទាប់ផងដែរ ខណៈ​កម្ពុជា គឺជាប្រទេសមានសក្តានុពល និងក៏ជាគោលលដៅសម្រាប់ភ្ញៀវទេសចរ។

ចំណែកឯកឧត្តម សុខ សប្បាយណា អនុរដ្ឋលេខាធិការក្រសួងអប់រំយុវជន យុវជន និងកីឡា លើក​ឡើងផងដែរថា ជុំវិញវិស័យ កីឡានេះ ក្រសួងតែងតែយកចិត្តទុកដាក់ចំពោះសកម្មភាព និង​ការ​ជួយ​ជំរុញដល់ការលើកកម្ពស់វិស័យ កីឡា ជាពិសេសសុខុមាលភាព ប្រជាជន ស្រប​តាម​រដ្ឋ​ធម្មនុញ្ញ​របស់​ព្រះរាជាណាចក្រកម្ពុជា និងគោលនយោបាយស្តីពី​ការអភិវឌ្ឍវិស័យអប់រំកាយ និង​កីឡា ឆ្លើយតប ទៅនិងចក្ខុវិស័យរបស់រាជរដ្ឋាភិបាល គឺនៅឆ្នាំ ២០៣០ កម្ពុជា​ក្លាយ​ជា​ប្រទេស​មាន​​ប្រាក់​ចំណូល​មធ្យមកម្រិតខ្ពស់ និងឆ្នាំ ២០៥០ ជា ប្រទេសមានប្រាក់ចំណូលកម្រិតខ្ពស់។

នៅក្នុងទិវានេះដែរ លោកជំទាវ ដេវីយ៉ានី ខុប្រាហ្គាដ (Devyani Khobragade) ឯកអគ្គ​រដ្ឋទូត នៃ​សាធារណ​រដ្ឋឥណ្ឌា ប្រចាំនៅកម្ពុជា លើកឡើងថា ព្រឹត្តិការណ៍យោគៈអន្តរជាតិ បានសង្កេត​ឃើញ​ថា មានការប្រារព្ធធ្វើឡើងនៅទូទាំងពិភពលោក ប្រកបដោយភាពរីករាយ និងក្លៀវក្លា យោគៈ​គឺ​ជាសិល្បៈ និងវិជ្ជានៃការរស់នៅប្រកបដោយសុខភាពល្អ ដែលនាំឱ្យមាន​ភាព​សុខ​ដុម​ល្អ​ឥត​ខ្ចោះ​រវាងចិត្ត រូបមនុស្ស និងធម្មជាតិ ការដឹងរបស់បុគ្គល និងការដឹងជា​សកល​៕ អត្ថបទ៖ ស៊ុន រ៉ាឌី