ឯកឧត្ដមកិត្តិបណ្ឌិត ហ៊ីង ប៊ុនហៀង មានប្រសាសន៍ថា គណបក្សប្រជាជនកម្ពុជា ជាស្នូល​នៃ​ការ​បង្រួប​បង្រួមជាតិ គណបក្សប្រជាជនកម្ពុជាបានស្វាគមន៍ចំពោះសមាជិក សមាជិកា​គ្រប់​និន្នាការ​គណបក្ស​នយោបាយ​ទាំង​អស់​ដែល​មាន​បំណង​មក​ចូល​រួម​ក្នុង​ជីវភាព​នយោបាយ​ជា​មួយ​គណ​បក្ស​ប្រជាជន​កម្ពុជា ដើម្បី​រួម​សាមគ្គី​គ្នា​កសាង​ និង​អភិវឌ្ឍន៍​ប្រទេស​ជា​មួយ​ប្រមុខ​រាជ​រដ្ឋាភិបាល​កម្ពុជា។

ឯកឧត្ដម កិត្តិបណ្ឌិត ហ៊ីង ប៊ុនហៀង តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត បានថ្លែងដូចនេះ ក្នុង​ពិធី​សម្ពោធ​ដាក់ឱ្យប្រើប្រាស់ជាផ្លូវការនូវសាលាធម្មសភា និងសមិទ្ធិផលនានា នៅ​វត្ត​ទួល​សាលា ឃុំអន្លង់មៀត និងសំណោះសំណាលជាមួយប្រជាពលរដ្ឋ ក្នុងឃុំអន្លង់រមៀត ស្រុក​កណ្តាល​ស្ទឹង នាព្រឹកថ្ងៃទី១៨ ខែមិថុនា ឆ្នាំ២០២៣។

ឯកឧត្តម បានបញ្ជាក់ថា គណបក្សប្រជាជនកម្ពុជា តែងតែបានប្រកាន់គោលជំហររឹងមាំ និង​រក្សា​ជា​និច្ច​នូវ​បុព្វ​ហេតុ​បម្រើជាតិ និងប្រជាជន ដោយក្នុងនេះកម្មវិធីនយោបាយដ៏ត្រឹមត្រូវរបស់បក្ស ក៏​បាន​ប្រែ​ក្លាយ​ជា​គោលនយោបាយរបស់រាជរដ្ឋាភិបាលនៅរៀងរាល់អាណត្តិនយោបាយ បន្ទាប់​ពី​ជ័យជម្នះ​ក្នុង​ការបោះឆ្នោត ហើយគោលនយោបាយទាំងនេះ ក៏ត្រូវបានអនុវត្ត​យ៉ាង​មាន​ប្រសិទ្ធ​ភាព​ដោយ​មាន​ការ​ចូលរួមយ៉ាងសកម្មពីសំណាក់ប្រជាពលរដ្ឋនៅគ្រប់ស្រទាប់ ដែលជាកម្លាំង​ចលករ​ដ៏​មុតស្រួច។ ក្នុងន័យនេះក៏ត្រូវខិតខំប្រឹងប្រែងពង្រឹងបន្ថែមទៀត តាមរយៈ​ការ​យក​ចិត្ត​ទុក​ដាក់​កសាងសមិទ្ធផលទាំងវិស័យពុទ្ធចក្រ និងអាណាចក្រ អភិវឌ្ឍន៍ជាតិ និងផែនការ​សកម្ម​ភាព​ផ្សេង​ៗ ដើម្បីប្រយោជន៍ប្រជាពលរដ្ឋ ប្រទេសកម្ពុជា ហើយជាពិសេសនៅគ្រប់ការលំបាក សម្តេច​តេជោ​ប្រធានគណបក្សប្រជាជនកម្ពុជា មិនដែលរត់ចោលប្រជាជនម្តងណានោះទេ។ ដើម្បី​រក្សាសន្តិសុខ ស្ថិរភាពនយោបាយនៅកម្ពុជា យើងត្រូវ​ចូលរួម​ថែ​រក្សា​ទាំង​អស់​គ្នាបន្ត​ទៅ​ទៀត​ កុំជឿការញ៉ូសញ៉ុងរបស់ពួកជនអគតិ ដែល​មាន​បំណង​បំផ្លិច​បំផ្លាញ​ដល់​សុខ​សន្តិភាព​នៅ​កម្ពុជា​ និងសូមអញ្ជើញទៅបោះឆ្នោតថ្ងៃទី២៣ ខែកក្កដា២០២៣ខាងមុខនេះទាំងអស់គ្នា។

ក្នុង​ឱកាសនោះ នាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង បាន​នាំ​យក​អំណោយ​ដ៏​ថ្លៃ​ថ្លា​របស់​សម្តេចតេជោ ហ៊ុនសែន និងសម្តេចកិត្តិព្រឹទ្ធបណ្ឌិត បានប្រគេនដល់វត្ត ទួលសាលា មាន​ទ័យ​ទាន គ្រឿងឧបភោគបរិភោគ និងថវិកា ៥ពាន់ដុល្លាអាមេរិក, ព្រម​ទាំង​បាន​ចែក​ជូន​តាជី​យាយ​ជី មន្ត្រីក្រុមប្រឹក្សាអាជ្ញាធរដែនដី លោកគ្រូអ្នកគ្រូ យុវជន និងប្រជាពលរដ្ឋ ឃុំអន្លង់រមៀត ស្រុក​កណ្តាលស្ទឹង ខេត្តកណ្តាលជាច្រើនទៀតផងដែរ៕ អត្ថបទ៖ ម៉ក់ រ៉េនីតា