ក្រុមមន្ត្រីឆ្មាំល្បាតឆ្នេរហ្វីលីពីន បាននិយាយថា សាឡាងដឹកអ្នកដំណើរ១២០នាក់ និង​សមាជិក​នាវិក​ជា​ច្រើន បានឆេះនៅឆ្នេរសមុទ្រភាគកណ្តាលហ្វីលីពីននៅថ្ងៃអាទិត្យ (១៨ មិថុនា)នេះ។

នាវាឆ្មាំល្បាតឆ្នេរមួយគ្រឿង ត្រូវបានបញ្ជូនទៅពន្លត់អណ្ដាតភ្លើងដ៏សន្ធោសន្ធៅ និង​ជួយ​សង្គ្រោះ​មនុស្ស​នៅ​លើនោះ ។ រូបភាពពីឆ្មាំល្បាតឆ្នេរហ្វីលីពីន បានបង្ហាញ​ផ្នែក​ខ្លះ​នៃ​សាឡាង​កំពុង​ឆាប​ឆេះ ខណៈកងកម្លាំងសង្គ្រោះព្យាយាមពន្លត់អណ្តាតភ្លើង។ ក្រុមមន្ត្រីឆ្មាំល្បាតឆ្នេរបានបន្ថែមថា មនុស្ស​ទាំងអស់នៅលើសាឡាងនោះទាំង ១២០ នាក់ ត្រូវបានជួយសង្គ្រោះ ហើយ​មិន​មាន​របាយការណ៍​ថា​មានអ្នករងរបួសនោះទេ។

កាលពីខែមីនា មនុស្ស ២៩ នាក់បានស្លាប់ បន្ទាប់ពីសាឡាង​ដឹក​អ្នក​ដំណើរ​មួយ​បាន​ឆេះ​នៅ​ក្នុង​សមុទ្រ​ នៃ​ខេត្ត Basilan ភាគខាងត្បូង។ ប្រទេសហ្វីលីពីន ដែលជាប្រជុំកោះជាង ៧.៦០០ កោះ មាន​កំណត់ត្រាមិនល្អសម្រាប់សុវត្ថិភាពដែនសមុទ្រ ដោយនាវា​ឧស្សាហកម្ម​ដឹក​មនុស្ស​លើស​ចំណុះ ហើយនាវាចាស់ៗជាច្រើននៅតែត្រូវយកទៅប្រើប្រាស់នៅឡើយ៕ អត្ថបទ៖ ស្រីទាវ