ប្រធានាធិបតីសហរដ្ឋអាមេរិកលោក Joe Biden បានរៀបចំការ​ជួបជុំ​នយោបាយ​ជា​លើក​ដំបូង​របស់​ខ្លួន​កាលពីថ្ងៃសៅរ៍ ចាប់តាំងពី​បាន​ប្រកាស​ការ​ចាប់​ផ្តើម​យុទ្ធនាការ​បោះឆ្នោត​ឡើង​វិញ​របស់​លោក​កាល​ពីខែមេសា។ លោក Biden បានព្យាយាមស្វែងរកការគាំទ្រសម្រាប់ការឈរឈ្មោះឆ្នាំ ២០២៤ របស់ខ្លួនទៅកាន់សមាជិកសហជីពនៅទីក្រុង Philadelphia ។

លោក Biden បានគាំទ្រការចរចាជាសមូហភាពនៅក្រុមហ៊ុននានា ដោយលុបនូវច្បាប់​នានា​ដែល​ត្រូវ​បាន​អនុវត្តន៍ដោយអ្នកកាន់តំណែងមុនរបស់លោកមកពីគណបក្សសាធារណរដ្ឋ និង​ជា​គូ​ប្រជែង​ឈាន​មុខ​គេរបស់ខ្លួនគឺលោក Donald Trump ដែលធ្វើឲ្យចុះខ្សោយច្បាប់ការពារកម្មករ បាន​ជំរុញ​ឱ្យលុបចោលនូវការកាត់បន្ថយចំនួនសមាជិកភាពសហជីពជាច្រើនទសវត្សរ៍ហើយ និង​ធ្វើ​ឱ្យ​វា​កាន់​តែងាយស្រួលសម្រាប់ការងារសហជីពក្នុងការសាងសង់ស្ពាន និងកំពង់ផែ​ជុំ​វិញ​ប្រទេស​។

នៅក្នុងសុន្ទរកថារបស់ខ្លួន លោក Biden បានលើកឡើងអំពីកញ្ចប់ថវិកាហេដ្ឋារចនាសម្ព័ន្ធចំនួន ១,២ ពាន់ពាន់លានដុល្លារ ដែលបានអនុម័តជាមួយនឹងការគាំទ្រទ្វេភាគីនៅក្នុងសភា។

ហេដ្ឋា​រចនាសម្ព័ន្ធ គឺជាប្រធានបទសំខាន់នៃដំណើរទស្សនកិច្ចដែលលោក Biden បានធ្វើ​ឡើង​នៅ​មុ​​ន​ថ្ងៃ​នោះ។ លោក Biden បានទស្សនាកន្លែងកើតហេតុនៃផ្លូវហាយវេ I-95 ដែលបាន​បាក់​ក្នុង​រដ្ឋ Pennsylvania។ លោកបានសន្យាថានឹងផ្តល់មូលនិធិសង្គ្រោះបន្ទាន់ចំនួន ៣ លាន​ដុល្លារ ហើយបានសន្យាថានឹងសាងសង់ផ្លូវនោះឡើងវិញក្នុងពេលវេលាកំណត់៕ អត្ថបទ៖ ស្រីទាវ