ឯកឧត្ដមបណ្ឌិត ម៉ា ឈឿន អ្នកតំណាងរាស្ត្រមណ្ឌលខេត្តកំពង់ចាម និងជាប្រធានក្រុមការងារចុះជួយស្រុកជើងព្រៃ បានអំពាវនាវដល់ប្រជាពលរដ្ឋឲ្យអញ្ជើញទៅចូលរួមបោះឆ្នោតជ្រើសរើសតំណាងរាស្ដ្រនៅថ្ងៃទី២៣ ខែកក្កដា ខាងមុខនេះឱ្យបានគ្រប់ៗគ្នា ដើម្បីបំពេញកាតព្វកិច្ចចូលរួមអនុវត្តសិទ្ធិបោះឆ្នោត ក្នុងនាម ជាប្រជាពលរដ្ឋនៃប្រទេសប្រកាន់របបប្រជាធិបតេយ្យសេរីពហុបក្ស។
ការអំពាវនាវនេះ នៅក្នុងឱកាសដែល ឯកឧត្តម អញ្ជើញសម្ពោធសមិទ្ធផលនានា នៅក្នុងវត្តខ្នុរដំបង ឃុំខ្នុរដំបង ស្រុកជើងព្រៃ ខេត្តកំពង់ចាម នាព្រឹកថ្ងៃទី១៨ មិថុនា ឆ្នាំ២០២៣នេះ។
ឯកឧត្ដមបានយកឱកាសនេះ ជម្រាបជូនបងប្អូនប្រជាពលរដ្ឋដែរថា នៅប៉ុន្មានថ្ងៃទៀតខាងមុខនេះ រដូវឃោសនាបោះឆ្នោតនឹងឈានចូលមកដល់ ក្រុមប្រឆាំងបាននឹងកំពុងរិះរកគ្រប់ល្បិចកលទុច្ចរិត ដើម្បីបំផ្លាញដំណើរការបោះឆ្នោត ។
ឯកឧត្តម អំពាវនាវដល់បងប្អូនប្រជាពលរដ្ឋទាំងអស់ កុំជឿតាមការឃោសនាញុះញង់បោកប្រាស់របស់ក្រុមប្រឆាំង សូមកុំចូលរួមគ្រប់សកម្មភាពនៃមធ្យោបាយទុច្ចរិតទាំងឡាយ ព្រោះការបំផ្លាញដំណើរការបោះឆ្នោត ឬការរារាំងដំណើរការបោះឆ្នោតនាំឲ្យយើងអាចមានទុក្ខទុកដល់ខ្លួន ព្រោះវិសោធនកម្មច្បាប់បោះឆ្នោតថ្មី និងមានបញ្ញត្តិទាក់ទងនឹងការផាកពិន័យ ឬដាក់ទោសទណ្ឌចំពោះអ្នកដែលរារាំងដល់ដំណើរការបោះឆ្នោតគ្រប់មធ្យោបាយទុច្ចរិត។
ឯកឧត្តមសង្ឃឹមថា បងប្អូននឹងធ្វើការវិនិច្ឆ័យក្នុងការជ្រើសរើសគណបក្សដែលខ្លួនស្រឡាញ់ពេញចិត្ត ជាមួយនឹងជំនឿជឿជាក់ថា បងប្អូននឹងបន្តបោះឆ្នោតគាំទ្រគណបក្សប្រជាជនកម្ពុជា ដើម្បីគាំទ្រសម្ដេចតេជោ ហ៊ុន សែន បន្តដឹកនាំប្រទេស នៅរួមសុខរួមទុក្ខជាមួយបងប្អូនតទៅមុខទៀត។ ជាពិសេស គឺដើម្បីថែរក្សាសន្តិភាពឱ្យបានគង់វង្សយូរវង្វែង និងជំរុញដល់ការអភិវឌ្ឍប្រទេសជាតិឲ្យកាន់តែទទួលបានការអភិវឌ្ឍន៍រីកចម្រើនរុងរឿងតទៅអនាគត៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
