សាលាពុទ្ធិកបឋមសិក្សាវត្តព្រែកថ្លឹង និងសាលាសង្កាត់ព្រែកកំពឹស ទទួលបាន​សៀវភៅ​ពុម្ភ​សិក្សា​ថ្នាក់ទី៥ និងទី៦ និងសៀវភៅសរសេរអំពីសម្តេចតេជោ សម្តេចកិត្តិព្រឹទ្ធបណ្ឌិត និងឯកឧត្តម ហ៊ុន ម៉ាណែត សរុបចំនួន ២៥៤ក្បាល នៅថ្ងៃទី១៨ ខែមិថុនា ឆ្នាំ២០២៣។

លោក មែ ស៊ីថុន ប្រធានសមាគមអតីតសិស្ស-និស្សិត​នៅ​កម្ពុជា បានលើឡើងថា ឆ្លើយ​តប​នឹង​ការ​ស្នើ​សុំ​បិណ្ឌបាត្រ​ពីព្រះគ្រូចៅអធិការវត្តព្រែកថ្លឹង សាមគ្គីភាពនៃថ្នាក់ដឹកនាំ និងសមាជិក-សមាជិកា​សមាគម ព្រមទាំងសប្បុរសជន បានប្រគេនសៀវភៅពុម្ភសិក្សាទី៥ និងទី៦ ដល់​សាលា​ពុទ្ធិក​បឋម​សិក្សា វត្តព្រែកថ្លឹង ជាមួយនិងសៀវភៅសរសេរអំពីសម្តេចតេជោ សម្តេច​កិត្តិ​ព្រឹទ្ធ​បណ្ឌិត និងឯកឧត្តម ហ៊ុន ម៉ាណែត បន្ថែមទៀត និងជូនដល់សាលាសង្កាត់ព្រែកកំពឹស ផងដែរ ។ លោកបានបន្តថា ការប្រគេន និងប្រគល់ទទួលសៀវភៅដែលសរសេរអំពីសម្តេចតេជោ សម្តេច​កិត្តិ​ព្រឹទ្ធបណ្ឌិត និងឯកឧត្តម ហ៊ុន ម៉ាណែត ខាងលើនេះ គឺដើម្បីតម្កល់ទុកជាឯកសារ សម្រាប់​ប្រជាពលរដ្ឋ​ទូទៅ និងយុវជនជំនាន់ក្រោយបានសិក្សាឈ្វេងយល់អំពីប្រវត្តិសាស្ត្រ និង​សមិទ្ធផល​ពិត​របស់​ថ្នាក់ដឹកនាំ ។

ជាមួយគ្នានោះ ព្រះគ្រូធម្មបញ្ញាចារ្យ ចាន់ ប៊ុនហឿន ព្រះចៅអធិការវត្តព្រែកថ្លឹង បាន​សម្តែងនូវ​សេច​ក្តី​រីករាយ និងថ្លែងអំណរគុណយ៉ាងជ្រាលជ្រៅបំផុត ចំពោះសមាគមអតីតសិស្ស-និស្សិត​នៅ​កម្ពុជា និងសមាជិក-សមាជិកា ព្រមទាំងក្រុមការងារសៀវភៅ កូនប្រុសច្បងដ៏មានឥទ្ធិពល ទាំង​អស់ ដែលបានផ្តល់សៀវភៅពុម្ភសិក្សាថ្នាក់ទី៥ និងទី៦ ដល់​សមណសិស្ស​ដែល​បាន​និង​កំពុ​ងសិក្សា​នៅ​សាលាពុទ្ធិកបឋមសិក្សា វត្តព្រែកថ្លឹង ជាមួយនិងសៀវភៅសរសេរអំពីសម្តេចតេជោ សម្តេចកិត្តិព្រឹទ្ធបណ្ឌិត និងឯកឧត្តម ហ៊ុន ម៉ាណែត ដែលជា​សៀវភៅ​បែប​ប្រវត្តិ​សាស្ត្រ​ដ៏​មាន​តម្លៃ​នេះ​ ។ ព្រះគ្រូចៅអធិការ បានបន្តសង្ឃដីកាថា ការផ្តល់សៀវភៅដ៏មានតម្លៃ ប្រកបដោយខ្លឹមសារ និង​អត្ថន័យនៅពេលនេះ គឺពិតជាមានសារៈសំខាន់ខ្លាំងណាស់ ដល់​សមណសិស្ស​ទាំង​អស់​បាន​សិក្សា​ឈ្វេង​យល់ និងទុកសម្រាប់ជាកេរមរតកដល់កូនចៅខ្មែរតគ្រប់ៗជំនាន់តរៀងទៅ ។

ក្នុងឱកាសនោះដែរ លោក កន សុកេន ចៅសង្កាត់ព្រែកកំពឹស មានសេចក្តីសោមនស្សបំផុត ដោយ​បាន​ទទួលសៀវភៅប្រវត្តិសាស្ត្រដ៏មានតម្លៃបំផុត យកទៅតម្កល់​ទុក​នៅ​រដ្ឋបាល​សង្កាត់​សៀវភៅ ដើម្បីឲ្យមន្ត្រីសាលាសង្កាត់ និងព្រះសង្ឃ សិក្សា នៅសាលាពុទ្ធិក បានឈ្វេង​យល់​ឲ្យ​កាន់​តែ​ច្បាស់អំពី​ប្រវត្តិសាស្រ្តពិត ស្នាដៃ និងសមិទ្ធផលរបស់សម្តេចតេជោ សម្តេចកិត្តិ​ព្រឹទ្ធ​បណ្ឌិត និង​ឲ្យ​កាន់​តែ​យល់​ច្បាស់​អំពី​តួអ​ង្គ​ជា​បេក្ខភាព​នាយករដ្ឋ​មន្ត្រី​បន្ត​វេន​នាពេល​អនា​គត​ផង​ដែរ៕ អត្ថបទ៖ ឌី ពៅយី