ក្រុមអ្នកជំនាញផ្នែកច្បាប់ដែលជួយរដ្ឋអាជ្ញាអ៊ុយក្រែនក្នុងការស៊ើបអង្កេតបាននិយាយនៅក្នុងគំហើញបឋម ដែលចេញផ្សាយកាលពីថ្ងៃសុក្រ (១៦ មិថុនា)ថា វាទំនងជាមាន "ភាគរយខ្ពស់" ដែលថា​ការបាក់ទំនប់ Kakhovka នៅភាគខាងត្បូង​អ៊ុយក្រែន​ គឺ​បណ្តាល​មក​ពី​គ្រឿង​ផ្ទុះ​ដែល​ដាក់​បង្កប់​ដោយជនជាតិរុស្ស៊ី។

អ្នកជំនាញនៃក្រុមហ៊ុនច្បាប់សិទ្ធិមនុស្សអន្តរជាតិ Global Rights Compliance ដែលកំពុង​អនុវត្ត​កិច្ច​ខិតខំប្រឹងប្រែងគាំទ្រដោយលោកខាងលិច ដើម្បីគាំទ្រ​ការ​ទទួល​ខុស​ត្រូវ​ចំពោះ​អំពើ​ឃោរឃៅ​ក្នុង​ប្រទេសអ៊ុយក្រែន បានចុះទៅពិនិត្យតំបន់ Kherson ចាប់ពីថ្ងៃទី ១០ ដល់ ១១ ខែមិថុនា ជាមួយអគ្គរដ្ឋអាជ្ញាអ៊ុយក្រែន និងក្រុមស៊ើបអង្កេតមកពីតុលាការព្រហ្មទណ្ឌអន្តរជាតិ។

មេធាវីជនជាតិអង់គ្លេសលោកស្រី Catriona Murdoch ដែលដឹកនាំ​ការ​ស៊ើប​អង្កេត​ក្រុម​យុត្តិធម៌​ចល័ត​បាន​និយាយ​នៅ​ក្នុងសេចក្តីថ្លែងការណ៍មួយថា ការវាយប្រហារទំនប់​ដោយ​ចេតនា​អាច​បង្កើត​ជា​ឧក្រិដ្ឋកម្ម​សង្រ្គាម​នៅ​ក្រោមច្បាប់មនុស្សធម៌អន្តរជាតិ ពីព្រោះអំពើទាំងនោះ ត្រូវ​បាន​សន្មត់​ថា​ជា​ទ្រង់ទ្រាយ នៃបំផ្លិចបំផ្លាញទៅលើជនស៊ីវិល ប្រសិន​បើ​ពុំមាន​ការ​ចាប់​យក​គោល​បំណង ដើម្បី​ប្រយោជន៍យោធា។

ពួកគេបានច្រានចោលទ្រឹស្តីដែលថា ការបាក់ទំនប់ដ៏​មហន្តរាយ​នោះ​អាច​បណ្តា​ល​មក​ពី​ការ​គ្រប់​គ្រង​មិន​បាន​ត្រឹមត្រូវតែម្យ៉ាងនោះ។ ការវាយប្រហារនេះ​អាច​ក្លាយ​ជា​ផ្នែក​មួយ​ នៃ​ឧក្រិដ្ឋកម្ម​ប្រឆាំង​មនុស្ស​ជាតិដ៏ទូលំទូលាយ ប៉ុន្តែក្រុមស៊ើបអង្កេត​នេះ​មិន​ទាន់​បាន​ប្រកាស​កំណត់​យក​ជាផ្លូវ​ការ​ទេ​។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចោទប្រកាន់អ៊ុយក្រែនថា ការបំផ្លាញទំនប់ Kakhovka នោះជាយុទ្ធសាស្ត្រគាំទ្រដោយលោកខាងលិច ដើម្បីធ្វើឲ្យជម្លោះកើនឡើង។ អ៊ុយក្រែន​កំពុងស៊ើបអង្កេតការបំផ្ទុះនេះថាជាឧក្រិដ្ឋកម្មសង្គ្រាម និងលទ្ធភាព នៃ​ការ​បំផ្លិច​បំផ្លាញ​បរិស្ថាន​ជា​ឧក្រិដ្ឋឬហៅថា "ឧក្រិដ្ឋបរិស្ថានដោយចេតនា"៕ អត្ថបទ៖ ស្រីទាវ