រដ្ឋមន្រ្តីការបរទេសព្រះអង្គម្ចាស់ Faisal bin Farhan បានមានបន្ទូលកាលពីថ្ងៃសៅរ៍ (១៧ មិថុនា)ថា អារ៉ាប៊ីសាអូឌីត​ចង់​ឲ្យ​ពង្រឹង​សន្តិសុខ​ដែន​សមុទ្រ​នៅ​ក្នុង​តំបន់​ឈូង​សមុទ្រ​ដ៏​សំខាន់​ដែល​ជា​ផ្នែក នៃទំនាក់ទំនងរបស់ខ្លួនជាមួយគូប្រជែងដ៏យូរអង្វែងគឺអ៊ីរ៉ង់ ។

អ៊ីរ៉ង់ និងអារ៉ាប៊ីសាអូឌីតបានព្រមព្រៀងគ្នាកាលពីខែមីនា នៅក្នុងកិច្ចព្រមព្រៀង​ដែល​សម្រប​សម្រួល​ដោយ​ប្រទេសចិន ដើម្បីបញ្ចប់ការប្រេះឆាផ្នែកការទូត និងបង្កើតទំនាក់​ទំនង​ឡើង​វិញ​បន្ទាប់​ពី​មាន​អរិភាព​ជាច្រើន​ឆ្នាំ​ដែល​បាន​ធ្វើ​ឱ្យ​ប៉ះពាល់​ដល់​ស្ថិរភាព​តំបន់​រួម​ទាំង​នៅ​តំបន់​ឈូង​សមុទ្រ ប្រទេសយេម៉ែន ស៊ីរី និងលីបង់ផងដែរ។

ថ្លែង​បន្ទាប់ពីកិច្ចពិភាក្សាជាមួយសមភាគីអ៊ីរ៉ង់លោក Hossein Amirabdollahian នៅទីក្រុង Tehran ព្រះអង្គម្ចាស់ Faisal ក៏បានមានបន្ទូលថា ព្រះមហាក្សត្រអារ៉ាប៊ីសាអូឌីត និង​រជ្ជទាយាទ​កំពុង​ទន្ទឹង​រង់ចាំប្រធានាធិបតីអ៊ីរ៉ង់ Ebrahim Raisi "ទទួលយក​ការ​អញ្ជើញ​ឱ្យ​ទៅ​បំពេញ​ទស្សនកិច្ច​នៅ​ព្រះរាជាណាចក្រក្នុងពេលឆាប់ៗនេះ "។

លោក Amirabdollahian បានប្រាប់ព្រឹត្តិការណ៍ប្រព័ន្ធផ្សព្វផ្សាយរួមគ្នាតាមទូរទស្សន៍ថា សន្តិសុខមានសារៈសំខាន់សម្រាប់បណ្ដាប្រទេសក្នុងតំបន់៕ អត្ថបទ៖ ស្រីទាវ