នាវាឆ្មាំល្បាតឆ្នេរអេស្ប៉ាញមួយគ្រឿងបាននាំជនអន្តោប្រវេសន៍ ៣៨នាក់ ទៅកាន់កំពង់ផែ Arguineguin ក្នុងកោះ ក្រានកាណារីយ៉ា កាលពីថ្ងៃសៅរ៍ (១៧ មិថុនា) បន្ទាប់​ពី​ស្ទាក់​ចាប់​បាន​នៅ​ក្នុង​ទូកឈើមួយគ្រឿងដែលដឹកពួកគេនៅក្នុងមហាសមុទ្រអាត្លង់ទិក។ ក្រុមអាជ្ញាធរបាននិយាយថា ជនអន្តោប្រវេសន៍ ដែលមានដើមកំណើតមកពីទ្វីបអាហ្រ្វិកទាំងនោះ រួមមានអនីតិជនយ៉ាងតិច ១០នាក់ ហើយពួកគេត្រូវបានទៅយកនៅចម្ងាយ ៦ ម៉ាយពីកោះ ក្រាន​កាណារីយ៉ា។

សរុបមកមានជនអន្តោប្រវេសន៍ចំនួន ៨.១៤០នាក់ បានទៅដល់ប្រទេសអេស្ប៉ាញតាម សមុទ្រ រួមទាំងប្រជុំកោះកាណារី ក្បែរឆ្នេរសមុទ្រអាហ្រ្វិក ដោយថយចុះចំនួន ២៧% ពីឆ្នាំ ២០២២។ យោង​តាមអង្គការសប្បុរសធម៌ Walking Borders របស់អេស្ប៉ាញ មនុស្សចំនួន ២.៣៩០ នាក់​បាន​បាត់បង់ជីវិតដោយសារព្យាយាមទៅកាន់ប្រទេសអេស្ប៉ាញដោយសមុទ្រជាចម្បងកាលពីឆ្នាំ ២០២២៕ អត្ថបទ៖ ស្រីទាវ