ក្រុមគ្រូពេទ្យស្ម័គ្រចិត្ត សមាគមសម្ព័ន្ធយុវជនមុស្លិមកម្ពុជា (ស.យ.ម.ក) បាន​ចុះ​ពិនិត្យព្យាបាល​ជំងឺ​របស់​ប្រជាពលរដ្ឋខ្មែរ និងបងប្អូនខ្មែរឥស្លាមប្រមាណជាង ៥០០នាក់ នៅក្នុងសង្កាត់ដងទង់ ក្រុង​ខេមរភូមិន្ទ ខេត្តកោះកុង ដែលសកម្មភាពនេះ គឺបាន​បង្ហាញ​ពី​ការ​ចូលរួម​លើក​កម្ពស់​សុខមាលភាព​របស់ប្រជាពលរដ្ឋ នៅតាមសហគមន៍កម្ពុជា ឲ្យកាន់តែល្អប្រសើរ ។

ដោយសកម្មភាពនេះធ្វើឡើងកាលពីថ្ងៃទី១៧ ខែមិថុនា ឆ្នាំ២០២៣ ក្រោម​ជំនួយ​របស់​សមាគម​សម្រប​សម្រួល និងអភិវឌ្ឍន៍សង្គម សហការជាមួយសមាគមពិភពលោក នៃក្ដីមេត្តា នៃរដ្ឋកូវ៉ែត ។

ក្នុងពិធីបើកគម្រោងផ្ដល់សេវាលើកកម្ពស់សុខភាពសហគមន៍កម្ពុជានេះ ឯកឧត្តម រ៉ូហ្វី អូស្មាន តំណាង​រាស្ត្រមណ្ឌលពោធិ៍សាត់ និង​ជា​អនុ​ប្រធាន​គណៈ​ចលនា​សាសនិក​ឥស្លាម​របស់​គណបក្ស​ប្រជាជន​កម្ពុជា មានប្រសាសន៍ថា ការចុះពិនិត្យព្យាបាលជំងឺរបស់ពលរដ្ឋ នៅតាមមូលដ្ឋាននេះ គឺ​ជា​ការ​ចូលរួមចំណែកមួយ ជាមួយរាជរដ្ឋាភិបាល ដែលកំពុងខិតខំណាស់ ចំពោះ​ការ​លើក​កម្ពស់​សុខ​ភាពរបស់ពលរដ្ឋ ។

ឯកឧត្តមបន្តថា ផ្ដើមចេញពីបាតដៃទទេ គឺក្រោយថ្ងៃរំដោះ ៧មករា ឆ្នាំ១៩៧៩ គឺ​វិស័យ​សុខាភិបាល​នៅកម្ពុជា មានភាពលំបាកខ្លាំងណាស់ គ្មានអគារមន្ទីរពេទ្យល្អៗ បរិក្ខា​ពេទ្យ​មាន​ការ​ខ្វះ​ខាត មិនមានភាពទំនើប ប៉ុន្តែបច្ចុប្បន្នរាជរដ្ឋាភិបាលកម្ពុជា ដឹកនាំដោយសម្ដេចតេជោ ហ៊ុន សែន វិស័យសុខាភិបាលមានការរីកចម្រើនខ្លាំង គឺអគារ​មន្ទីរ​ពេទ្យ​បាន​ផុស​ឡើង​ជា​បន្ត​បន្ទាប់​ទាំង​នៅ​ក្នុង​រាជធានី និងបណ្ដាខេត្ត រួមទាំងការបំពាក់នូវសម្ភារៈបរិក្ខាទំនើបៗ ហើយ​ក្រុម​គ្រូ​ពេទ្យ​មាន​បទ​ពិសោធន៍ខ្ពស់ ។

ឯកឧត្តមបន្ថែមថា ការរីកចម្រើននេះ មិនត្រឹមតែវិស័យសុខាភិបាលមួយប៉ុណ្ណោះទេ គឺវិស័យ​ជា​ច្រើន​ក៏​កំពុង​មាន​ការវិវឌ្ឍន៍​ល្អផងដែរ ក្នុងនោះមានវិស័យហេដ្ឋារចនាសម្ព័ន្ធ ឧស្សាហកម្មជាដើម ដែល​នេះ​បានបង្ហាញពីការខិតខំប្រឹងប្រែង និងការយកចិត្តទុកដាក់របស់រាជរដ្ឋាភិបាល ដើម្បី​កាត់​បន្ថយ​ភាព​ក្រីក្រ និងលើកកម្ពស់ជីវភាពរបស់ពលរដ្ឋ៕ អត្ថបទ៖ បាន សុខរិទ្ធ