ព្រះអង្គម្ចាស់ នរោត្តម ចក្រាវុធ ព្រះប្រធានគណបក្សហ៊្វុនស៊ិនប៉ិច នៅរសៀលថ្ងៃទី១៧ ខែមិថុនា ឆ្នាំ២០២៣នេះ បានបន្តយាងចុះជួបសំណេះសំណាល និងសួរសុខទុក្ខ ដល់បងប្អូនជាសមាជិក-សមាជិកា កម្មករ-កម្មការិនី ព្រមទាំងប្រជារាស្រ្តអ្នកគាំទ្រនៅឃុំជីបាល ស្រុកស្រីសន្ធរ ខេត្តកំពង់ចាម។

ក្នុងពិធីសំណេះសំណាល និងសួរសុខទុក្ខនោះ ព្រះអង្គម្ចាស់ នរោត្តម ចក្រាវុធ បាន​មាន​បន្ទូលថា ព្រះអង្គពិតជាមានព្រះហឫទ័យរីករាយដែលបានយាងមកជួបសំណេះសំណាលជាមួយបងប្អូនសមាជិក-សមាជិកា កម្មករ-កម្មការិនី ប្រជារាស្រ្តអ្នកគាំទ្រ សារជាថ្មីម្ដងទៀតនៅស្រុកស្រីសន្ធរ ខេត្ត​កំពង់ចាម​នេះ បន្ទាប់ពីព្រះអង្គបានជួបកាលពីឆ្នាំ២០២២ កន្លងទៅ។ ព្រះអង្គម្ចាស់ បានមាន​ព្រះប​​ន្ទូលបញ្ជាក់ថា តាមរយៈជំនួបជាមួយកម្មករនិយោជិត គឺព្រះអង្គបាន​ទទួល​រាល់​បញ្ហា​របស់​បង​ប្អូន និងបានយកបញ្ហានោះ សម្រាប់​ធ្វើ​ការ​ដោះ​ស្រាយ​នៅ​ពេល​ដែល​គណបក្ស​ហ៊្វុនស៊ិនប៉ិច​ទទួល​បាន​អាសនៈក្នុងរដ្ឋសភានីតិកាលទី៧ ។

 ជាមួយគ្នានោះដែរព្រះអង្គម្ចាស់ ព្រះប្រធាន បានថ្លែងអំណរគុណដល់បងប្អូនសមាជិក សមាជិកា កម្មករ-កម្មការិនី ដែលបានគាំទ្រដល់គណបក្សហ៊្វុនស៊ិនប៉ិចនាពេលកន្លងមក ហើយ​ព្រះ​អង្គ​ក៏​បានអំពាវ នាវឲ្យបងប្អូនទាំងអស់ទៅចូលរួមបោះឆ្នោតអាណត្តិទី៧ ដែលនឹងប្រព្រឹត្ត​ទៅ​នា​ថ្ងៃ​ទី២៣ ខែកក្កដា ឆ្នាំ២០២៣ខាងមុខនេះផងដែរ៕ អត្ថបទ៖ បាន ចក់