រដ្ឋមន្ត្រីការបរទេសអាមេរិក លោក Anthony Blinken បានទៅដល់សម្រាប់កិច្ចប្រជុំជាមួយ​រដ្ឋមន្ត្រី​ការ​បរទេសចិន លោក Qin Gang នៅថ្ងៃអាទិត្យ (១៨ មិថុនា)នេះ ដែលលោកជា​ប្រមុខ​ការ​ទូត​អាមេរិក​ដំបូងគេដែលទៅបំពេញទស្សនកិច្ចនៅប្រទេសចិនក្នុងរយៈពេល ៥ ឆ្នាំ ស្រប​ពេល​ទំនាក់ទំនងទ្វេភាគីមានភាពមិនសូវចុះសម្រុង និង​ការ​រំពឹង​ទុក​កម្រិត​ទាប​សម្រាប់​ជំហាន​រីក​ចម្រើន​ណាមួ​យនៅក្នុ​ង​បញ្ជី​ដ៏​វែង​នៃ​ជម្លោះ​រវា​ង​ប្រទេស​មហាសេដ្ឋកិ​ច្ច​ដ៏​ធំ​បំផុត​ទាំង​ពីរ​របស់​ពិភព​លោកនេះ។

លោក Qin Gang បានស្វាគមន៍លោក Blinken និង​ក្រុមកា​រងារ​របស់​លោក​នៅមា​ត់​ទ្វារ​ផ្ទះវីឡាមួយ​កន្លែង​ក្នុងបរិវេណផ្ទះសំណាក់រដ្ឋ Diaoyutai(ទាវយូថៃ) ទីក្រុងប៉េកាំង ខណៈ​ដែល​អ្នក​ទាំង​ពីរបាននិយាយគ្នាជាភាសាអង់គ្លេសមុនពេលចាប់ដៃគ្នានៅមុខទង់ជាតិចិន និងអាមេរិក។

បន្ទាប់ពីចូលទៅក្នុងបន្ទប់ប្រជុំ ទាំងលោក Blinken ទាំងលោក Qin មិនបាន​ធ្វើ​អត្ថាធិប្បាយ​នៅ​ចំពោះ​មុខ​អ្នកសារព័ត៌មានដែលត្រូវបានអនុញ្ញាតឱ្យចូលក្នុងរយៈពេលខ្លីនោះទេ។

ក្នុងអំឡុងពេលស្នាក់នៅរបស់លោករហូតដល់ថ្ងៃច័ន្ទ (១៩ មិថុនា) លោក Blinken ក៏ត្រូវ​បានគេរំពឹងថានឹងជួបជាមួយអ្នកការទូតជាន់ខ្ពស់របស់ចិនលោក Wang Yi និង​អាច​ជួប​ជា​មួយ​លោក​ប្រធានាធិបតី Xi Jinping ដោយស្វែងរកការបង្កើតច្រកទំនាក់ទំនងនៅបើកចំហនិងយូរអង្វែងដើម្បីធានាថាការប្រកួតប្រជែងជាយុទ្ធសាស្រ្តរវាងប្រទេសទាំងពីរកុំក្លាយជាជម្លោះ៕ អត្ថបទ៖ ស្រីទាវ