ប្រមុខការទូតអាមេរិក លោក Antony Blinken បានជួបអ្នកការទូតជាន់ខ្ពស់ និងអាចជួប​ប្រធានាធិបតីចិន​នៅថ្ងៃចន្ទនេះ ជាថ្ងៃ​ចុង​ក្រោយ នៃដំណើរ​ទស្សនកិច្ច​ដ៏​កម្រ​ទៅ​កាន់​ទីក្រុង​ប៉េកាំង ក្នុង​បំណងទប់ស្កាត់ការមិនឯកភាពគ្នាជាច្រើនរបស់គូប្រជែងជាយុទ្ធសាស្រ្ត កុំឲ្យ​ទំនាក់​ទំនង​កាន់​តែ​ដុនដាបថែមទៀត។

ជាប្រមុខការទូតដំបូងរបស់សហរដ្ឋអាមេរិក ដែលបានទៅបំពេញទស្សនកិច្ចក្នុងប្រទេសចិន រយៈ​ពេល ៥ឆ្នាំ​មកនេះ លោក Blinken បានជួបពិភាក្សាប្រកបដោយភាពស្មោះត្រង់ និងស្ថាបនា រយៈ​ពេល​ ៧ម៉ោងកន្លះ ជាមួយប្រមុខការទូតចិន លោក ឈីន កាង (Qin Gang) កាលពី​ថ្ងៃ​អាទិត្យ ទោះបី ជាប្រមុខការទូតទាំង២ពី ទំនងពុំបានបង្កើតវឌ្ឍភាពដ៏រឹងមាំស្ដីពីជម្លោះនានា ដែល​រួមទាំង បញ្ហាកោះតៃវ៉ាន់ ពាណិជ្ជកម្ម សិទ្ធិមនុស្ស និង ការនាំចូលទំនិញខុសច្បាប់ជាដើម ក៏ដោយក្ដី ។ 

ភាគីទាំង២ បានបង្ហាញ​បំណង​រក្សាទំនាក់ទំនង​ប្រកប​ដោយ​ស្ថិរភាព​ទោះ​បី​ជាមន្ត្រី​អាមេរិក​មួយ​រូប​បាន​ហៅ ថាជាការខ្វែងគំនិតដ៏ជ្រៅក៏ដោយ និងបានឯកភាពថា លោកឈីន នឹង​ទៅ​បំពេញ​ទស្សន​កិច្ច​ក្នុងទីក្រុងវ៉ាស៊ីនតោន ដើម្បីបន្តការសន្ទនា បន្ថែមទៀត ត្បិតពុំបាន​ប្រកាស​ពី​កាល​បរិច្ឆេទ​ក៏​ដោយ។

លោក Blinken បានជួបប្រមុខការទូតជាន់ខ្ពស់របស់ចិន លោក Wang Yi នៅថ្ងៃចន្ទនេះ ប៉ុន្តែ មាន​ការផ្ដោតខ្លាំងទៅលើបញ្ហាថាតើលោកនឹងជួបលោកប្រធានាធិបតីចិន Xi Jinping ឬអត់ ។

ក្រុម​មន្ត្រីអាមេរិក និង ក្រុមអ្នកវិភាគរំពឹងថា ដំណើររបស់លោក Blinken នឹងត្រួសត្រាយផ្លូវ សម្រាប់​កិច្ចប្រជទ្វេភាគីបន្ថែមទៀត ដែលនឹងមកដលក្នុងពេលប៉ុន្មានខែខាងមុខ និងអាចរៀប​ចំ​ឲ្យ​មាន​ជំនួ​បរវាងលោក Xi និងលោក Biden នៅជំនួបកំពូលពហុភាគីនៅពេលក្រោយឆ្នាំនេះ។  

ខណៈដែលភាគីទាំង២ បាននិយាយថា ការពិភាក្សាកាលពីថ្ងៃអាទិត្យ ប្រកបដោយការស្ថាបនា ប្រមុខ​ការទូតទាំង២ទំនងជាបានព្រមព្រៀងតិចតួច ក្រៅតែពី​ការ​សន្ទនា​ដែល​នឹង​បន្ត​នៅ​ឯ​ជំនួប​ចុង​ក្រោយ​ក្នុ​ងទីក្រុងវ៉ាស៊ីនតោន និងកំពុងធ្វើការ​ ដើម្បី​បង្កភាព​ងាយ​ស្រួល​សម្រាប់​ពលរដ្ឋ​របស់​ប្រទេស​ទាំង​២ ក្នុងការធ្វើដំណើរទៅវិញទៅមករវាងប្រទេសទាំង២៕ អត្ថបទ៖ សុខមាន