ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងថា រហូតមកដល់ពេលនេះ គ្មានប្រទេសណាមួយចេញមុខមករិះគន់ព្រឹត្តិការណ៍ប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះសម្រាប់ឆ្នាំ២០២៣នោះទេ ផ្ទុយទៅវិញព្រឹត្តិការណ៍ដ៏ប្រវត្តិសាស្រ្តមួយនេះ ត្រូវបានគេកោតសរសើរ និងអគុណកម្ពុជាទៅវិញទេ ដែលបានទទួលប្រតិភូកីឡារបស់ពួកគេបានយ៉ាងល្អ និងប្រកបដោយភាពរាក់ទាក់។

ក្នុងឱកាសអញ្ជើញជាអធិបតីភាពក្នុងពិធីសម្ពោធដាក់ឲ្យប្រើប្រាស់ជាផ្លូវការ រោងចក្រ​ប្រព្រឹត្តកម្មទឹកស្អាតបាក់ខែង ស្ថិតនៅសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ នាព្រឹកថ្ងៃទី១៩ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន ​បានលើកឡើងថា សម្តេចនូវ​តែបន្ត​សម្តែងនូវមោទនភាព ចំពោះព្រឹត្តិការណ៍ស៊ីហ្គេម ដែលកម្ពុជាបានធ្វើជាម្ចាស់ផ្ទះ​នាពេល​កន្លងទៅ​ជាមួយនឹងភាពជោគជ័យយ៉ាងត្រចះត្រចង់ ប្រកបដោយភាពរលូន​ក្នុងប្រវត្តិសាស្រ្តកម្ពុជា​ខណៈការជោគជ័យទាំងនេះគឺសម្រាប់បងប្អូនប្រជាពលរដ្ឋខ្មែរទាំងអស់គ្នាផងដែរ។

សូមបញ្ជាក់ថា ទាក់ទងនឹងព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេមនេះ​សម្តេចតែង តែរំលឹកជារឿយៗថា ព្រឹត្តិការណ៍កីឡាស៊ីហ្គេលើកទី៣២ និងអាស៊ានប៉ារ៉ាហ្គេមលើកទី១២ដែល កម្ពុជា​ធ្វើជាម្ចាស់ផ្ទះឆ្នាំ២០២៣នេះ វា​មិនមែន​បន្សល់​ទុក​កិត្តិយស​កម្ពុជា​ត្រឹមតែមួយថ្ងៃពីរថ្ងៃ ឬមួយឆ្នាំ ទៅពីរឆ្នាំនោះទេ ​វានឹង​បន្សល់ទុកនូវកិត្តិយសកម្ពុជារាប់រយឆ្នាំទៅមុខទៀត ដោយ​ការ​បន្សល់ទុកកិត្តិយសរាប់រយឆ្នាំនេះគឺតាមរយៈកម្ពុជាមិនឲ្យគ្រប់ប្រតិភូ ​ឬ​អត្តពលិក​បរទេស​ទាំងអស់បង់ថ្លៃសេវាផ្សេងៗ​ សម្រាប់នៅក្នុងព្រឹត្តិការណ៍ដ៏ធំមួយនេះ។

សម្តេចក៏បានលើកឡើងផងដែរថា ​សម្តេចពិតជាបានសម្រេចចិត្តត្រូវ ខណៈដែលកម្ពុជា​ធ្វើជាម្ចាស់ផ្ទះនៃព្រឹត្តិការណ៍ស៊ីហ្គេម​ ដោយចាប់ផ្តើមពី​គំនិត​ផ្ដួចផ្ដើម​នៃ សមាហរណកម្មអាស៊ាន តាមរយៈនៃការមិនបង់ថ្លៃផ្សេងៗ​របស់ប្រតិភូកីឡាដែលបានចូលរួមប្រកួតនេះ៕ អត្ថបទ៖ បាន ចក់