ភ្នំពេញ៖ យុវជន បានបញ្ជាក់អះអាងថា នឹងទៅបោះឆ្នោតជ្រើសតាំងតំណាងរាស្រ្តនីតិកាលទី៧ ហើយនឹងបន្ត គាំទ្រគណបក្សប្រជាជនកម្ពុជា ឱ្យដឹកនាំរាជរដ្ឋាភិបាល ដើម្បីធានាបាននូវសុខសន្តិភាព និងការអភិវឌ្ឍរីកចម្រើនតទៅអនាគត ។
ក្រុមយុវជនរស់នៅរាជធានីភ្នំពេញ នៅថ្ងៃទី១៩ ខែមិថុនា នេះ បានប្រាប់BTVថា ពួកគេ នឹងបន្ត ការគាំទ្រគណបក្សប្រជាជនកម្ពុជា ព្រោះថា បក្សនេះ មានស្នាដៃជាច្រើនក្នុងការកសាងអភិវឌ្ឍន៍ប្រទេសជាតិឱ្យរីកចម្រើន ដោយផ្ដើមចេញពីសម្ដេចតេជោ ហ៊ុន សែន បានខិតខំប្រឹងប្រែងនាំយកសុខសន្តិភាពពេញបរិបូរណ៍ជូនប្រទេសជាតិ និងពលរដ្ឋ ដោយនយោបាយ ឈ្នះ ឈ្នះ ។
ការបោះឆ្នោតជ្រើសតាំងតំណាងរាស្រ្ត នីតិកាលទី៧ នឹងប្រព្រឹត្តទៅនៅថ្ងៃអាទិត្យទី២៣ ខែកក្កដា ឆ្នាំ២០២៣ ចាប់ពីម៉ោង៧:០០ព្រឹក រហូតដល់ម៉ោង ៣:០០រសៀល។
ដើម្បីបោះឆ្នោតបានប្រជាពលរដ្ឋ ខ្មែរ ត្រូវមានឈ្មោះក្នុងបញ្ជីបោះឆ្នោត និងត្រូវមានអត្តសញ្ញាណបណ្ណសញ្ជាតិខ្មែរ មានសុពលភាព (អ.ខ) ឬឯកសារបញ្ជាក់អត្តសញ្ញាណបម្រើឱ្យការបោះឆ្នោត (ឯ.អ) ។
ករណីប្រជាពលរដ្ឋមានឈ្មោះក្នុងបញ្ជីបោះឆ្នោតហើយ ប៉ុន្តែពុំទាន់មានអត្តសញ្ញាណបណ្ណសញ្ជាតិ-ខ្មែរ ឬបានអស់សុពលភាព ឬមិនទាន់ទទួលបាន ឬបាត់ ឬខូច ឬកែតម្រូវ ប្រជាពលរដ្ឋ អាចប្រើប្រាស់ឯកសារ បញ្ជាក់អត្តសញ្ញាណបម្រើឱ្យការបោះឆ្នោត ឆ្នាំ២០២៣ ដើម្បីបោះឆ្នោត ។
សម្រាប់ឯកសារបញ្ជាក់អត្តសញ្ញាណបម្រើឱ្យការបោះឆ្នោត នឹងត្រូវធ្វើជូនប្រជាពលរដ្ឋរយៈពេល ៣០ថ្ងៃ ចាប់ពីថ្ងៃទី២២ ខែមិថុនា ដល់ថ្ងៃទី២១ ខែកក្កដា ឆ្នាំ២០២៣ នៅគណៈកម្មការឃុំ សង្កាត់រៀបចំការបោះឆ្នោត និងត្រូវបញ្ជាក់សុពលភាពដោយអាជ្ញាធរឃុំ សង្កាត់ ដែលសាមីខ្លួនមានឈ្មោះក្នុងបញ្ជី បោះឆ្នោតផ្លូវការ និងត្រូវបោះឆ្នោត ៕អត្ថបទ៖ ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
