​រុស្ស៊ី៖ ប្រធានាធិបតី​រុស្ស៊ី លោក Vladimir Putin​ កាលពី​ថ្ងៃ​អង្គារ បាន​ចេញ​បញ្ជា​ឲ្យ​សេវា​សហព័ន្ធ​នៃ​កងកម្លាំង​ឆ្មាំ​ជាតិ​រុស្ស៊ី ចាប់ផ្ដើម​ធ្វើការ​លើ​និយតកម្ម​គ្រប់គ្រង​អាវុធ​ថ្មី ក្រោយ​ហេតុការណ៍​បាញ់​ប្រហារ​នៅ​សាលារៀនមួយ​កន្លែង បណ្ដាល​ឲ្យ​មនុស្សយ៉ាងហោចណាស់​ ៨​នាក់​ស្លាប់ នេះបើ​យោង​តាមប្រភព​ពី​ទីក្រុង​ក្រឹម​ឡាំង​។​

​យោង​តាម​សេចក្ដីរាយការណ៍​របស់​សារព័ត៌មាន​ AP កាលពី​ព្រឹក​ថ្ងៃ​អង្គារ​ខ្មាន់កាំភ្លើង​ម្នាក់​អាយុ​ ១៩ឆ្នាំ​បានបើកការបាញ់ប្រហារក្នុង​សាលារៀន​មួយ​នៅទីក្រុង Kazan និង​បាន​សម្លាប់​សិស្សសាលា ​៧​នាក់ និង​គ្រូ​បង្រៀន​ម្នាក់ ចំណែក​មនុស្ស ​២១​នាក់​ផ្សេងទៀតកំពុង​សម្រាក​ព្យាបាល​នៅ​មន្ទីរពេទ្យ​។ លោក Putin​ ក៏បាន​ចូលរួម​រំលែក​ទុក្ខ​ផង​ដែរចំពោះក្រុម​គ្រួសារ​ជន​រងគ្រោះ ​និង​បួងសួង​សុំ​ឲ្យ​អ្នករបួស​ទាំងនោះ​ឆាប់​ជាសះស្បើយ​។​

​អ្នក​កាន់ទុក្ខ​រាប់​រយ​នាក់​បាន​យក​របស់​លេង​ និង​ផ្កា​ទៅកាន់​ស្តូប​រំឭក​វិញ្ញាណក្ខន្ធ​បណ្ដោះ​អាសន្ន ​នៅ​ខាងក្រៅ​សាលារៀន​ក្នុង​ទីក្រុង Kazan ជាទី​ដែល​ខ្មាន់កាំភ្លើង​ម្នាក់​បាន​បាញ់សម្លាប់​មនុស្ស ​៨​នាក់​រួមមាន​សិស្ស​សាលា​ស្រី​ ៧​នាក់​ផង​ដែរ​កាលពី​ថ្ងៃ​អង្គារ​៕

អត្ថបទ៖ សុខមាន