យោងតាមសេចក្តីថ្លែងការណ៍រួមដែលចេញដោយប្រទេសអារ៉ាប៊ីសាអ៊ូឌីត និងសហរដ្ឋអាមេរិក បានឲ្យដឹងថា ជីវិតធម្មតាបានវិលត្រឡប់មកវិញដោយផ្នែកនៅតាមដងផ្លូវនានានៅតំបន់រដ្ឋធានីប្រទេសស៊ូដង់ បន្ទាប់ពីកងកម្លាំងប្រដាប់អាវុធស៊ូដង់ (SAR) និងគូប្រជែងកងកម្លាំងគាំទ្ររហ័ស (RSF) បានព្រមព្រៀងលើបទឈប់បាញ់ថ្មីរយៈពេល ៧២ ម៉ោង។

បទឈប់បាញ់ បានចូលជាធរមានចាប់ពីម៉ោង ០៦:០០ ម៉ោងក្នុងតំបន់កាលពីថ្ងៃអាទិត្យ។ ក្រសួងសុខាភិបាលរបស់ប្រទេសបាននិយាយថា យ៉ាងហោចណាស់ជនស៊ីវិល ១៧ នាក់ រួមទាំងកុមារ៥នាក់ ស្ត្រីនិងមនុស្សចាស់បានស្លាប់ ហើយលំនៅឋានចំនួន ២៥ខ្នងត្រូវបានបំផ្លាញកាលពីថ្ងៃសៅរ៍ក្នុងការវាយប្រហារតាមអាកាសនៅភាគខាងត្បូងទីក្រុង Khartoum ។

ដោយការចាប់ផ្តើមនៃអំឡុងពេលបទឈប់បាញ់កាលពីថ្ងៃអាទិត្យ ពលរដ្ឋជាច្រើនបានចេញមកនៅតាមដងផ្លូវដើម្បីទិញសម្ភារៈប្រើប្រាស់ចាំបាច់ប្រចាំថ្ងៃ ខណៈអ្នកផ្សេងទៀតចាកចេញពីទីក្រុង Khartoum ទៅកាន់តំបន់នៅជុំវិញនោះដែលមានស្ថិរភាព។ បទឈប់បាញ់នេះធ្វើឡើងទាន់ពេលវេលា។ វាផ្តល់ឱ្យយើងនូវឱកាសដើម្បីចាកចេញពីលំនៅឋាននិងដឹងពីស្ថានភាព។ មុននោះ មនុស្សអាចស្នាក់នៅតែក្នុងលំនៅឋានរៀងរាល់ថ្ងៃ។ ទោះជាយ៉ាងណា បញ្ហាសន្តិសុខ និងមនុស្សធម៌នាពេលបច្ចុប្បន្ននេះ នៅតែធ្ងន់ធ្ងរនៅក្នុងប្រទេសស៊ូដង់ ដោយមានឧបទ្ទវហេតុជាញឹកញាប់នៃការចូលលួច និងប្លន់ រួមផ្សំនឹងកង្វះខាតធនធានវេជ្ជសាស្ត្រ។ រដ្ឋមន្ត្រីក្រសួងសុខាភិបាលរបស់ប្រទេសនេះ បាននិយាយកាលពីថ្ងៃសៅរ៍ថា មនុស្សជាង ៣.០០០នាក់បានស្លាប់ និង ៦.០០០នាក់បានរងរបួសចាប់តាំងពីជម្លោះបានផ្ទុះឡើង។ មានត្រឹមតែពាក់កណ្តាលនៃមន្ទីរពេទ្យចំនួន១៣០កន្លែង នៅទីក្រុង Khartoum នៅដំណើរការ ហើយមន្ទីរពេទ្យទាំងអស់នៅទីក្រុង West Darfur មិនដំណើរការនោះទេ។ មូលនិធិសង្គ្រោះកុមារអន្តរជាតិរបស់អង្គការសហប្រជាជាតិ (UNICEF) បាននិយាយកាលពីថ្ងៃអាទិត្យថា កុមារជាង ១៣ លាននាក់នៅក្នុងប្រទេសកំពុងត្រូវការជំនួយមនុស្សធម៌បន្ទាន់ ហើយកុមារជាង១លាននាក់ បានភៀសខ្លួនចេញ។

ទន្ទឹមនឹងនេះ ប្រជាពលរដ្ឋមានការព្រួយបារម្ភចំពោះជីវភាពរស់នៅបច្ចុប្បន្នដែលរងការគំរាមកំហែងដោយសារកង្វះទឹក និងស្បៀងអាហារ។