ឥណ្ឌូនេស៊ី ៖ ព្រះចៅអធិរាជជប៉ុន Naruhito បានយាងទៅជួបជាមួយប្រធានាធិបតីឥណ្ឌូនេស៊ី លោក Joko Widodo នៅថ្ងៃចន្ទ (ទី១៩ ខែមិថុនា)នេះ ក្នុងអំឡុងព្រះរាជទស្សនកិច្ចផ្លូវរដ្ឋលើកដំបូងរបស់ព្រះអង្គ គិតចាប់តាំងពី​ឡើងគ្រង​រាជបល្ល័ង្គ Chrysanthemum ( គ្រីសានធិម៉ាំ) ក្នុងឆ្នាំ២០១៩។

ព្រះរាជដំណើរទស្សនកិច្ច នៅចន្លោះថ្ងៃទី ១៧-២៣ខែមិថុនារបស់ព្រះចៅអធិរាជ Naruhito និងព្រះអគ្គមហេសី Masako ទៅកាន់ប្រទេសសេដ្ឋកិច្ចដ៏ធំបំផុតរបស់អាស៊ីអាគ្នេយ៍មួយនេះ បានកើតឡើងបន្ទាប់ពីមានការយាងអញ្ជើញពីលោក Widodo អំឡុងទស្សនកិច្ចរបស់លោកទៅកាន់ទីក្រុងតូក្យូ ប្រទេសជប៉ុន កាលពីឆ្នាំមុន។

លោក Widodo បានប្រាប់អ្នកយកព័ត៌មាន នៅមុនពិធីលៀងក្រយាព្រះស្ងោយថ្ងៃត្រង់ផ្លូវការថា៖ «ការយាងដំណើរទស្សនកិច្ចរបស់ព្រះមហាក្សត្រ និងព្រះមហាក្សត្រីមកកាន់ប្រទេសឥណ្ឌូនេស៊ី បានធ្វើឲ្យចំណង​មិត្តភាព រវាងប្រជាជនរបស់យើងកាន់តែរឹងមាំឡើងថែមទៀត។ មូលដ្ឋានគ្រឹះដ៏រឹងមាំបែបនេះ គឺចាំបាច់ណាស់ សម្រាប់ការអភិវឌ្ឍន៍ភាពជាដៃគូយុទ្ធសាស្ត្រ រវាងប្រទេសយើងទាំងពីរ ជាពិសេសក្នុងវិស័យសេដ្ឋកិច្ចតែម្ដង»។

ទីក្រុងតូក្យូ និងហ្សាការតា បានបង្វែរមកធ្វើពង្រឹងទំនាក់ទំនងកាន់តែប្រសើរឡើង ក្នុងប៉ុន្មានឆ្នាំថ្មីៗនេះ ដោយក្រុមមន្ត្រីជប៉ុន បានលើកឡើងពីសារៈសំខាន់នៃសេដ្ឋកិច្ចដែលកំពុងរីកចម្រើនរបស់ប្រទេសឥណ្ឌូនេស៊ី និងទីតាំងយុទ្ធសាស្ត្រ ដែលនៅជិតផ្លូវដឹកជញ្ជូនសកល។

គួររំលឹកដែរថា ប្រទេសជប៉ុនធ្លាប់បានគ្រប់គ្រងប្រទេសឥណ្ឌូនេស៊ីអស់រយៈពេលជាង ៣ឆ្នាំ ចាប់ពីឆ្នាំ១៩៤២។ នៅពេលទីក្រុងតូក្យូ ព្រមចុះចាញ់ក្នុងសង្គ្រាមលោកលើកទី២ ការបះបោរដោយប្រដាប់អាវុធ​ប្រឆាំងនឹងការ​គ្រប់គ្រងរបស់ហូឡង់ និងការទាមទារឯករាជ្យភាពរបស់ប្រទេសឥណ្ឌូនេស៊ី កើតមានបន្ទាប់ពីនោះ។

នៅថ្ងៃអង្គារ ព្រះចៅអធិរាជ និងព្រះអគ្គមហេសី នឹងយាងទៅទីបញ្ចុះសពយោធា ក្នុងទីក្រុងហ្សាការតា ជាកន្លែង​ដែលអតីតទាហានជប៉ុន ២៨នាក់ បានស្នាក់នៅ និងប្រយុទ្ធក្នុងសង្គ្រាមទាមទារឯករាជ្យរបស់ឥណ្ឌូនេស៊ី (១៩៤៥-១៩៤៩) ត្រូវបានបញ្ចុះ៕,