ប្រជាពលរដ្ឋរស់នៅក្នុងស្រុកភាគខាងលិច Kachchhប្រទេសឥណ្ឌា កំពុងស្តាឡើងវិញ និងជួសជុលផ្ទះសម្បែងរបស់ពួកគេ ក្រោយព្យុះស៊ីក្លូន Biparjoy បន្សល់ទុកការបំផ្លិច​បំផ្លាញ​ទ្រង់​ទ្រាយធំ។ 

ក្រុមឧតុនិយមនិយយាថា ព្យុះស៊ីក្លូនដែលទីបញ្ចប់បានថមថយកម្លាំងទៅវិញក្រោយបង្កភាពវឹកវរ និងការបំផ្លិចបំផ្លាញនៅតំបន់ភាគខាងលិចប្រទេសឥណ្ឌា និងតំបន់ភាគខាងត្បូង​ប្រទេស​​ប៉ាគី​ស្ថាន បានបណ្តាលមនុស្សយ៉ាងហោច ៦នាក់ស្លាប់។ 

ព្យុះ​ស៊ីក្លូន Biparjoy ដែលមានន័យថាគ្រោះមហន្តរាយជាភាសាបឹងហ្គាលី បានបោកបក់លើរដ្ឋ Gujarat ខាងលិចប្រទេសឥណ្ឌា ជាមួយនឹងល្បឿនខ្យល់បក់ ១២៥គ.ម ក្នុង ១ម៉ោង និង​បាន​បណ្តាលឲ្យមានការខូចខាតទ្រង់ទ្រាយធំ ជាពិសេសធ្វើឲ្យខូចខាតហេដ្ឋារចនាសម្ព័ន្ធអគ្គិសនី ធ្វើឲ្យបង្គោលចរន្តអគ្គិសនីរាប់ពាន់ដើមដួលរាបដល់ដី និង​ធ្វើឲ្យ​ដាច់​ខ្សែអគ្គិសនីផងដែរ 

កាលពីថ្ងៃអាទិត្យម្សិលមិញ តំបន់ជាច្រើន បន្តជន់លិចដដែល ដោយសារតែភ្លៀងធ្លាក់ខ្លាំងបង្កឡើងដោយសារព្យុះស៊ីក្លូននេះ។ យោងតាមសេចក្តីថ្លែងការណ៍ពីរដ្ឋាភិបាល បាន​ឲ្យ​ដឹង​ថា នៅតាមភូមិជាច្រើនកន្លែង ថាមពលអគ្គិសនី ត្រូវបានកាត់ផ្តាច់ ខណៈវិធានការប្រុងប្រយ័ត្នជាមុន ដើម្បីជៀសផុតពីកើតមានឧបទ្ទេវហេតុអំឡុងពេលព្យុះ ស្រប​ពេល​ដែល​ផ្ទះ​ប្រជាពល​រដ្ឋជាង ៧០០ខ្នងនៅតាមស្រុកតំបន់ឆ្នេរចំនួន ៨ក្នុងរដ្ឋ Gujarat បានរងការខូចខាតទាំងស្រុង ឬខូចខាតដោយផ្នែក។ 

គួររំឭក​ថា កាលពីឆ្នាំ ១៩៩៨ ព្យុះស៊ីក្លូនដ៏ខ្លាំងនៅរដ្ឋ Gujarat បានសម្លាប់មនុស្សប្រហែល ៤ពាន់នាក់ ខណៈដែលកាលពីឆ្នាំ ២០២១ មនុស្សជិត ១០០នាក់ បាន​ស្លាប់​ដោយ​សារព្យុះ​ស៊ីក្លូន Tauktae (តូកតេ) នៅរដ្ឋមួយនេះ៕