ប៉ាគីស្ថាន ៖ មនុស្ស ៩នាក់ដែលជាប់សង្ស័យនឹងអំពើរត់ពន្ធមនុស្ស នឹងត្រូវបង្ហាញខ្លួននៅចំពោះមុខ​តុលាការ​ក្រិកដែលត្រូវបានចោទប្រកាន់ថា បានបើកលិចទូកនេសាទ នៅម្ដុំឆ្នេរសមុទ្រនៃប្រទេសក្រិក កាលពីសប្តាហ៍មុន ដែលបណ្ដាលឲ្យមនុស្សរាប់រយនាក់បាត់ខ្លួន និងសន្មតថាស្លាប់ នៅក្នុងគ្រោះមហន្តរាយ​លិចទូកដ៏អាក្រក់​បំផុតមួយនៅសមុទ្រមេឌីទែរ៉ាណេ។

អាជ្ញាធរក្រិកបាននិយាយថា អ្នកស្លាប់មានចំនួន ៧៨នាក់ ហើយអ្នករួចរស់ជីវិតចំនួន១០៤នាក់ ដែលភាគច្រើន​មកពីប្រទេសស៊ីរី អាហ្វហ្គានីស្ថាន អេហ្ស៊ីប និងប៉ាគីស្ថាន ត្រូវបាននាំយកមកលើគោក បន្ទាប់ពីទូកដែលផ្ទុក​លើសចំណុះបានលិចប្រហែល ៥០ម៉ាយល៍ (៨០គីឡូម៉ែត្រ) ពីទីក្រុង Pylos ភាគខាងត្បូងនៃប្រទេសក្រិក កាលពីព្រឹកថ្ងៃពុធ ប៉ុន្មានថ្ងៃបន្ទាប់ពីទូកនេះ បានចេញដំណើរពីទីក្រុងកំពង់ផែ Tobruk ក្នុងប្រទេសលីប៊ី ឆ្ពោះទៅប្រទេសអ៊ីតាលី។

មនុស្សជាង ៥០០នាក់ ត្រូវបានជឿថា បាត់ខ្លួន ដោយក្នុងនោះរួមទាំងកុមារជាច្រើននាក់ផងដែរ ហើយក្រុមគ្រួសារសាច់​ញាតិនៅតែស្វះស្វែងរកព័ត៌មាន បន្ទាប់ពីទូកបានលិចនៅក្នុងផ្នែកដែលមានទឹកជ្រៅបំផុតនៃសមុទ្រមេឌីទែរ៉ាណេ។

បន្ទាប់ពីមានលេចឭព័ត៌មានថា ប្រជាជនប៉ាគីស្ថានរាប់សិបនាក់ ស្ថិតក្នុងចំណោមអ្នកនៅលើទូកនេសាទនោះ នាយករដ្ឋមន្ត្រីប៉ាគីស្ថាន លោក Shehbaz Sharif បានចេញបញ្ជាឲ្យមានបង្ក្រាបភ្លាមៗលើភ្នាក់ងារ ដែលពាក់ព័ន្ធនឹងអំពើរត់ពន្ធមនុស្ស ដោយលោកប្រាប់ថា ជនទាំងនោះ ត្រូវតែទទួលទោសទណ្ឌយ៉ាងធ្ងន់ធ្ងរ។ លោក Sharif បាននិយាយ នៅថ្ងៃចន្ទ (ទី១៩ ខែមិថុនា) នេះថា នឹងមានថ្ងៃកាន់ទុក្ខ ក្នុងប្រទេសប៉ាគីស្ថាន ដោយទង់ជាតិ ត្រូវបង្ហូតនៅពាក់កណ្តាលដង។ នៅមុននេះ លោកធ្លាប់បាននិយាយថា ស្ថានទូតប៉ាគីស្ថាន ប្រចាំនៅក្រុងអាតែន ប្រទេសក្រិក បានកំណត់អត្តសញ្ញាណជនជាតិរបស់ខ្លួនចំនួន១២នាក់ ដែលត្រូវបានជួយសង្គ្រោះ ដោយឆ្មាំល្បាតឆ្នេរ។

មិនមានព័ត៌មានផ្លូវការណាមួយដែលថា តើមានជនជាតិប៉ាគីស្ថានប៉ុន្មាននាក់នៅលើទូកនោះ តើមានមនុស្ស​ប៉ុន្មាននាក់នៅរស់រានមានជីវិត និងចំនួនប៉ុន្មាននាក់បានស្លាប់នោះទេ តែគេជឿថា សរុបអាចមានច្រើនជាង ២០០នាក់៕