ភ្នំពេញ៖ ឯកឧត្តម សៅ សារឿន សមាជិកគណៈកម្មាធិការកណ្តាលគណបក្សប្រជាជនកម្ពុជា អនុប្រធានក្រុមការងារ ចុះមូលដ្ឋានស្រុកវ៉ារិន ប្រធានក្រុមការងារចុះជួយមូលដ្ឋានឃុំវ៉ារិន បានអំពាវនាវដល់ប្រជាពលរដ្ឋទាំងអស់សូមត្រៀមខ្លួន ទៅបោះឆ្នោតជូនគណបក្សប្រជាជនកម្ពុជានៅថ្ងៃទី២៣ ខែកក្កដាមុខនេះឲ្យបានគ្រប់ៗគ្នា ដើម្បីអនុវត្តសិទ្ធិពលរដ្ឋក្នុងការជ្រើសរើសមេដឹកនាំដែលខ្លួនស្រលាញ់ ។
ឯកឧត្តម ប្រធានក្រុមការងារចុះជួយឃុំវ៉ារិនបានថ្លែងបែបនេះនៅក្នុងពិធីប្រកាសបញ្ចូលសមាជិកថ្មីចំនួន ៤៥៧នាក់ របស់គណបក្សប្រជាជនកម្ពុជា ឃុំវ៉ារិន ខេត្តសៀមរាប នាចុងសប្តាហ៍កន្លងទៅនេះ ។
ឯកឧត្តម បានសំដែងនូវការអបអរសាទរ ចំពោះសមាជិកថ្មី របស់គណបក្សប្រជាជនកម្ពុជាទាំង៤៧៥នាក់ ដោយបានផ្ដាំផ្ញើត្រូវមានបេះដូងស្មោះត្រង់ចំពោះបក្ស ស្មោះត្រង់ជាតិ ស្មោះត្រង់ប្រជាជន និងធ្វើយ៉ាងណាខិតខំរៀនសូត្រ ជួយសង្គម ធ្វើឲ្យខ្លួនក្លាយជាបញ្ញាជន ដើម្បីចូលរួមអនុវត្តគ្រប់សកម្មភាពអភិវឌ្ឍ ប្រទេសជាតិឲ្យមានការរីកចម្រើនទៅមុខ ពិសេសផ្សព្វផ្សាយដល់យុវជនយុវតីទាំងអស់ដែលជាមិត្តភក្តិរបស់ខ្លួន និងបងប្អូនសាច់ញាតិឲ្យយល់ពីតម្លៃនៃសុខសន្តិភាព ព្រមទាំងដឹងគុណដល់ សម្ដេចតេជោ ហ៊ុន សែន ដែលជាមគ្គុទ្ទេសក៍ឯកដែលបានដឹកនាំប្រទេសជាតិឲ្យមានការរីកចម្រើន និងជាអ្នកបង្រួបបង្រួមជាតិពីសង្គ្រាមឲ្យស្គាល់តែសន្តិភាព និងការអភិវឌ្ឍរីកចំរើន ។
ជាមួយគ្នានេះឯកឧត្តម សៅ សារឿន បន្តថា ក្នុងរយៈពេលជាង ៤០ឆ្នាំមកនេះ ក្រោមម្លប់សនិ្តភាពពេញលេញ និងក្រោមការដឹកនាំរបស់គណបក្សប្រជាជនកម្ពុជា ប្រជាពលរដ្ឋពិតជា មានមោទនភាពយ៉ាងក្រៃលែងចំពោះសមិទ្ធផលជាប្រវត្តិសាស្ត្រជាច្រើនឥតគណនា ដែលកើតឡើងពីការខិតខំប្រឹងប្រែងរបស់យើងទាំងអស់គ្នា ក្នុងការស្តារ និងកសាងប្រទេសជាតិមួយដែលត្រូវបំផ្លិចបំផ្លាញ ញាំញី ដោយសារសង្គ្រាមដ៏រ៉ាំរ៉ៃអស់ច្រើនទស្សវត្សរ៍ ឱ្យក្លាយជាទឹកដីមួយ ដែលពោរពេញ ដោយសុខសន្តិភាព ស្ថិរភាព និងមានការរីកចម្រើនឥតឈប់ឈរ និងកំពុងបោះជំហានទៅមុខយ៉ាងស្វាហាប់ឆ្ពោះទៅកាន់អនាគតដ៏រុងរឿង។
កម្ពុជាមិនដែលមានសន្តិភាពទេ ប៉ុន្តែមកដល់សម័យតេជោសែន គឺកម្ពុជាមានឯកភាពជាតិទឹកដី ក្រោមដំបូលតែមួយ គឺសម្ដេចតេជោ ហ៊ុន សែន ជាប្រធាន គណបក្សប្រជាជនកម្ពុជា ដែលរូបលោក បាន យក ជីវិតធ្វើជាដើមទុនតាមរយៈអនុវត្ត គោលនយោបាយឈ្នះ ឈ្នះ របស់សម្ដេចតេជោ ហ៊ុន សែន បានដឹកនាំកម្ពុជាតាំងពីបាតដៃទទេរហូតដល់ប្រទេស មានសុខសន្តិភាព មានការឯកភាពជាតិ និងបន្តដំណើរឆ្ពោះទៅកាន់ការអភិវឌ្ឍន៍ ការរីកចម្រើន។
ឯកឧត្តមបានលើកឡើងបន្តថា “យើងត្រូវចាំថា សន្តិភាពនិងការអភិវឌ្ឍមានទំនាក់ទំនងគ្នាយ៉ាងជិតស្និទ្ធ។ សន្តិភាពបង្កើតលក្ខខណ្ឌចាំបាច់សម្រាប់ការអភិវឌ្ឍ។ ដោយសារសន្តិភាពពេញលេញនេះហើយ ទើបធ្វើឱ្យប្រទេសជាតិទទួលបាននូវកំណើនសេដ្ឋកិច្ច ស្ថិរភាពសង្គម និងការអភិវឌ្ឍប្រកបដោយចីរភាព។
ដូច្នេះមន្ត្រីមូលដ្ឋានក៏ដូចជា កម្លាំងយុវជនទាំងអស់គ្នា ត្រូវតែបន្តអនុវត្តនិងផ្សព្វផ្សាយពីទង្វើល្អរបស់គណបក្សប្រជាជនកម្ពុជាឲ្យរឹតតែខ្លាំងឡើង ហើយខ្លួនឯងផ្ទាល់ក៏ត្រូវតែធ្វើល្អបម្រើប្រជាពលរដ្ឋឲ្យរឹតតែល្អហើយត្រៀមខ្លួនទៅបោះឆ្នោតជ្រើសតាំង តំណា ង រាស្ត្រ នៅពេលដ៏ខ្លីខាងមុខនេះឱ្យបានគ្រប់ៗគ្នា៕ អត្ថបទ៖ មុត សុទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
