​ប្រទេស​ឥណ្ឌូនេស៊ី និង​ក្រុមហ៊ុន​អវកាស SpaceX របស់លោក Elon Musk នៅ​ថ្ងៃ​ចន្ទ (​ទី​១៩ ខែមិថុនា​) នេះ បាន​បាញ់​បង្ហោះ​ផ្កាយរណប​ទូរគមនាគមន៍​ដ៏​ធំ​បំផុត​របស់​ប្រទេស​នេះ​ពី​សហរដ្ឋអាមេរិក នៅក្នុង​គម្រោង​តម្លៃ ៥៤០​លាន​ដុល្លារ ដែល​ការបាញ់​បង្ហោះ​នេះ មានបំណង​ភ្ជាប់​តំបន់​ដាច់ស្រយាល​នានា​នៃ​ប្រទេស​ប្រជុំ​កោះ​នេះ​ទៅនឹង​ប្រព័ន្ធ​អ៊ិន​ធឺ​ណិ​ត​។​

​ប្រហែល ២​ភាគ​៣ នៃ​ចំនួន​ប្រជាជន ២៨០​លាន​នាក់​របស់​ប្រទេស​ឥណ្ឌូនេស៊ី មាន​អ៊ិន​ធឺ​ណិ​ត​ប្រើប្រាស់​រួចហើយ ប៉ុន្តែ​សមត្ថភាព​ត​ភ្ជាប់​មាន​កម្រិត នៅ​តំបន់​កោះដាច់​ស្រយាល​ភាគ​ខាងកើត ដែល​មិនទាន់មាន​ការអភិវឌ្ឍ​របស់​ប្រទេស​អាស៊ីអាគ្នេយ៍​មួយ​នេះ​។​

​លោក Mahfud MD ទេសរដ្ឋមន្ត្រី​ឥណ្ឌូនេស៊ី បាន​និយាយ​នៅក្នុង​សេចក្តីថ្លែងការណ៍​មួយ​ថា​៖ «​បច្ចេកវិទ្យា​ផ្កាយរណប នឹង​ព​ន្លឿ​ន​ដល់​ការផ្ដល់​ការប្រើប្រាស់​អ៊ិន​ធឺ​ណិ​តទៅ​កាន់​ភូមិ​នានា នៅក្នុង​តំបន់ ដែល​មិនអាច​ទៅដល់​បាន​ដោយ​ខ្សែកាប​អុ​ប​ទិ​ក ក្នុង​រយៈពេល ១០​ឆ្នាំ​ខាងមុខ​»​។​

​ផ្កាយរណប​ទម្ងន់ ៤,៥​តោន​របស់​សាធារណរដ្ឋ​ឥណ្ឌូនេស៊ី (SATRIA-1) ត្រូវបាន​បង្កើតឡើង​ដោយ​ក្រុមហ៊ុន​អវកាស Thales Alenia ហើយ​ត្រូវបាន​បាញ់​បង្ហោះ​ទៅក្នុង​គន្លង​តារាវិថី​ពី​រដ្ឋ​ផ្លរីដា ដោយ​យាន​ចម្លង Falcon 9 របស់​ក្រុមហ៊ុន SpaceX ដែល​បន្ទាប់មក​បាន​ត្រឡប់​មកកាន់​ទីតាំង​ក្នុង​សមុទ្រ សម្រាប់​ការចុះ​ចត​យ៉ាងច្បាស់​លាស់​មួយ​៕​