ភ្នំពេញ៖ សេចក្តីព្រាងច្បាប់ស្តីពី វិធានការដើមកំណើតទំនិញ នឹងជួយលើកកម្ពស់ការនាំចេញទំនិញរបស់កម្ពុជា ក៏ដូចជាការជួយទប់ស្កាត់ការក្លែងបន្លំដើមកំណើតទំនិញ ដែលច្បាប់នេះ គឺធ្វើឡើង ស្របតាមគោលការណ៍អាស៊ាន និងអង្គការពាណិជ្ជកម្មពិភពលោកផងដែរ ។

បន្ទាប់ពីកិច្ចប្រជុំគណៈកម្មាធិការអចិន្រ្តៃយ៍ព្រឹទ្ធសភា ក្រោមអធិបតីភាព របស់សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៅថ្ងៃទី២០ ខែមិថុនា ឯកឧត្តម ម៉ម ប៊ុននាង អ្នកនាំពាក្យព្រឹទ្ធសភា មានប្រសាសន៍ថា សេចក្តីព្រាងច្បាប់ស្តីពី វិធានដើមកំណើតទំនិញ រៀបចំឡើង ក្នុងគោលបំណងកំណត់អំពីគោលការណ៍ និងវិធានដើមកំណើតទំនិញនាំចេញ និងនាំចូល ដើម្បីជំរុញ និងសម្រួលពាណិជ្ជកម្មក្រោមប្រព័ន្ធអនុគ្រោះពាណិជ្ជកម្ម និងក្រៅប្រព័ន្ធអនុគ្រោះពាណិជ្ជកម្ម ។

ឯកឧត្តមបានបន្តថា សេចក្តីព្រាងច្បាប់នេះ នឹងធានានូវដើមកំណើតទំនិញ របស់កម្ពុជា ក្នុងការ​លើកកម្ពស់ និងជំរុញការនាំចេញផលិតផលរបស់កម្ពុជា​ ព្រមទាំងចូលរួមទប់ស្កាត់ ការក្លែងបន្លំ​ដើមកំណើតទំនិញផងដែរ ។

ឯកឧត្តមអ្នកនាំពាក្យ បន្ថែមថា សេចក្តីព្រាងច្បាប់ស្តីពី វិធានការដើមកំណើតទំនិញ គឺជាការ​អនុវត្តបន្ថែម នូវលិខិតបទដ្ឋានគតិយុត្តក្នុងវិស័យសេដ្ឋកិច្ច ​និងពាណិជ្ជកម្ម ដែលត្រូវរៀបចំឡើង​ស្រប​តាមគោលការណ៍អាស៊ាន ​និងអង្គការពាណិជ្ជកម្មពិភពលោកផងដែរ និងជាផ្នែកមួយដ៏មាន​សារសំខាន់ នៃប្រព័ន្ធច្បាប់នៅលើពិភពលោក ដោយដើរទន្ទឹមគ្នាជាមួយកិច្ចព្រមព្រៀង​ពាណិជ្ជកម្ម​សេរីទ្វេភាគី តំបន់ និងពហុភាគី ដូចជាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ កិច្ចព្រមព្រៀងពាណិជ្ជកម្មសេរីគ្រប់ជ្រុងជ្រោយកម្ពុជា-ចិន និងកម្ពុជា-កូរ៉េ ជាដើម ។

ឯកឧត្តម ម៉ម ប៊ុននាង ​បានបញ្ជាក់ថា បន្ទាប់ពីពិនិត្យ និងពិភាក្សារួចមក គណៈកម្មាធិការអចិន្ត្រៃយ៍​ព្រឹទ្ធសភាជាតិ នឹងលើកយកសេចក្តីព្រាងច្បាប់ស្តីពីវិធានការដើមកំណើតទំនិញ នឹងលើកយក​ទៅពិនិត្យ ហើយឲ្យយោបល់ ក្នុងសម័យប្រជុំលើកទី១០ ព្រឹទ្ធសភានីតិកាលទី៤ ​នៅថ្ងៃទី២១ ខែមិថុនា​ ឆ្នាំ២០២៣ស្អែកនេះ ជាមួយនឹងរបៀបវារៈមួយទៀត គឺពិនិត្យហើយឱ្យយោបល់លើ​សេចក្តីព្រាង​ច្បាប់ស្តីពី អត្រានុកូលដ្ឋាន ស្ថិតិអត្រានុកូល-ដ្ឋាន និងអត្តញ្ញាណកម្ម ៕ អត្ថបទ បាន សុខរិទ្ធិ