ភ្នំពេញ៖ គណៈកម្មការវិនិយោគសាធារណៈ បើកកិច្ចប្រជុំលើកទី១ នៃការគ្រប់គ្រងគម្រោងវិនិយោគសាធារណៈ លើបញ្ហាប្រភពហិរញ្ញប្បទាន ការតាមដាន, និងការវាយតម្លៃលើវឌ្ឍនភាពនៃការអនុវត្តគម្រោងវិនិយោគសាធារណៈ ដោយជំរុញឲ្យមានគុណភាព និងប្រសិទ្ធភាពខ្ពស់ ដើម្បីឆ្លើយតបទៅនឹងតម្រូវការអភិវឌ្ឍន៍នៅកម្ពុជា។
ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុលើកឡើង ក្នុងកិច្ចប្រជុំលើកទី១ នៃគណៈកម្មការវិនិយោគសាធារណៈ នៅថ្ងៃទី២០ ខែមិថុនា ឆ្នាំ២០២៣ នេះថា ជុំវិញការអនុវត្តគម្រោងវិនិយោគ សាធារណៈនេះ ពិតជាមានសារៈសំខាន់ណាស់សម្រាប់កម្ពុជា ដើម្បីជំរុញអភិវឌ្ឍន៍នូវគ្រប់ហេដ្ឋារចនាសម្ព័ន្ធ នៃគម្រោងអាទិភាពរបស់ រាជរដ្ឋាភិបាល និងខិតខំប្រឹងប្រែងធានានូវប្រសិទ្ធផល និងប្រសិទ្ធភាពចំណាយ ជាពិសេសការចំណាយសម្រាប់កម្មវិធីកាត់បន្ថយភាព ក្រីក្រ និងការផ្តោតសំខាន់លើវិស័យនានា ដើម្បីឆ្លើយតបទៅនិងតម្រូវការចន្តរនៃការអភិវឌ្ឍន៍របស់កម្ពុជា។
ឯកឧត្តម បន្តថា ទាក់ទិនគម្រោងវិនិយោគសាធារណៈនេះ ចាប់ពីពេលនេះទៅមុខ តម្រូវការនៃការវិនិយោគសាធារណៈមាន កាន់តែច្រើន និងកាន់តែមានភាពស្មុគស្មាញ ដែលបញ្ហានេះទាមទារឲ្យមន្ត្រីទទួលបន្ទុក ត្រូវខិតខំប្រឹងប្រែងយកចិត្តទុកដាក់ លើបញ្ហា គ្រប់គ្រងថវិការ ការតាមដាន និងវាយតម្លៃលើវឌ្ឍនភាពនៃគម្រោង ក្នុងនោះចំពោះគម្រោងដែលអនុវត្តរួចរាល់ ត្រូវបើកឲ្យមានកិច្ចប្រជុំ ដើម្បីវាយតម្លៃ និងភ្ជាប់នូវឯកសារពាក់ព័ន្ធនានា នូវរាល់ការអនុវត្តគម្រោងទាំងឡាយ។
សូមបញ្ជាក់ថា យោងតាមកម្មវិធីវិនិយោគសាធារណៈ ៣ឆ្នាំរំកិល ២០២២-២០២៤ របស់រាជរដ្ឋាភិបាល សម្រាប់ការអនុវត្តផែនការយុទ្ធ សាស្ត្រអភិវឌ្ឍន៍ជាតិ ២០១៩-២០២៣ ត្រូវបានធ្វើការប៉ាន់ស្មានតម្លៃសរុបជាង ៩៥ ៥២៧ ប៊ីលានរៀល ត្រូវប្រមាណជាង ២៣ ពាន់លានដុល្លារអាម៉េរិក សម្រាប់បំពេញតម្រូវការវិនិយោតវិស័យសាធារណៈ គោលនយោបាយអាទិភាពរបស់រាជរដ្ឋាភិបាល នីតិកាលទី៦៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
