អូឡាំពិក៖ រដ្ឋាភិបាលប្រេស៊ីលបានអោយដឹងថា ការចាក់វ៉ាក់សាំងប្រឆាំង Covid-19 ជូនអត្តពលិករបស់ខ្លួនចាប់ផ្ដើមនៅថ្ងៃពុធនេះ មុនចេញទៅចូលរួមការប្រកួតអូឡាំពិក និងប៉ារ៉ាឡាំពិកទីក្រុងតូក្យូ។
រដ្ឋមន្ត្រីក្រសួងសុខាភិបាលប្រេស៊ីល លោក Marcelo Queiroga បានអោយដឹងក្នុងសន្និសីទសារព័ត៌មាននៅថ្ងៃអង្គារម្សិលមិញថា ប្រេស៊ីលនឹងប្រើប្រាស់វ៉ាក់សាំង ២ប្រភេទរួមមានវ៉ាក់សាំងរបស់ក្រុមហ៊ុនឱសថចិន Sinovac និង Pfizer ដើម្បីចាក់ជូនដល់អត្តពលិក និងសមាជិកពាក់ព័ន្ធដែលនឹងធ្វើដំណើរទៅទឹកដីជប៉ុនដូចជា គ្រូបង្វឹក ក្រុមពេទ្យ មន្ត្រីអាជ្ញាកណ្តាល និងអ្នកសារព័ត៌មានជាដើម។ លោក Marcelo បានប៉ាន់ស្មានថា មនុស្សចំនួន ១៨១៤នាក់នឹងត្រូវទទួលវ៉ាក់សាំងនេះគ្រប់គ្នាមុនចេញទៅជប៉ុន។
ប្រេស៊ីលនឹងបញ្ចប់ការចាក់ដូសទី២ ដល់អត្តពលិករបស់ខ្លួនគ្រប់គ្នានៅថ្ងៃទី២១ ខែមិថុនា ខណៈព្រឹត្តិការណ៍អូឡាំពិកទីក្រុងតូក្យូនឹងចាប់ផ្តើមនៅថ្ងៃទី២៣ ខែកក្កដាដល់ថ្ងៃទី៨ ខែសីហានេះ។ សូមបញ្ជាក់ថា ប្រេស៊ីលជាប្រទេសដែលរងគ្រោះធ្ងន់មួយ ដោយសារមេរោគរាតត្បាត COvid-19 ដោយមានអត្រាអ្នកស្លាប់ដល់ទៅជាង ៤០ម៉ឺននាក់៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
