កំពង់ឆ្នាំង៖ នៅរសៀលថ្ងៃទី២០ ខែមិថុនា ឆ្នាំ២០២៣នេះ សម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រអបរមរាជវាំង បានអំពាវនាវអោយប្រជាពលរដ្ឋទៅចូលរួមបោះឆ្នោតអោយបានគ្រប់ៗគ្នា ដើម្បីជ្រើសរើសមេដឹកនាំប្រទេសដែលរក្សាបាននូវសុខសន្តិភាព ស្ថេរភាពនយោបាយ និងការ​អភិវឌ្ឍ​អោយ​ប្រជាជន និងសង្គមជាតិរីកចំរើន។ សម្តេចចៅហ្វាវាំងបានមានប្រសាសន៍បែបនេះ ក្នុងពេលសម្តេច​ចុះជួប​សួរសុខទុក្ខ និងសំណេះសំណាលបងប្អូនប្រជាជលរដ្ឋក្នុងភូមិជំទាវ ឃុំច្រេស ស្រុកកំពង់ត្រឡាច ខេត្តកំពង់ឆ្នាំង ។

សម្តេចចៅហ្វាវាំង គង់ សំអុល បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលជានិច្ចកាល សម្តេច​តែងតែបានយកចិត្តទុកដាក់ គិតគូរជានិច្ចសុខទុក្ខ និងការលំបាករបស់​បងប្អូនប្រជាពលរដ្ឋ​គ្រប់ទីកន្លែង​គ្រប់​ពេលវេលា ដោយមិនប្រកាន់ពូជសាសន៍ និងនិន្នាការនយោបាយឡើយ។

សម្តេច បានអំពាវនាវដល់ប្រជាពលរដ្ឋទាំងអស់ដែលគ្រប់អាយុ ត្រូវទៅចូលរួមបោះឆ្នោត​ជ្រើសតាំង​តំណាង​រាស្រ្ត​នីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ខាងមុខនេះអោយបានគ្រប់ៗគ្នា ហើយម្តាយឪពុក​ដែលមាន​កូនៗទៅធ្វើការនៅតាមរោងចក្រទាំងអស់ក្នុងខេត្តកំពង់ឆ្នាំង ក៏ត្រូវប្រាប់កូនៗអោយចូលរួមបោះឆ្នោត ដើម្បីបំពេញ​កាតព្វកិច្ច និងសិទ្ធិជាប្រជាពលរដ្ឋនៅក្នុងប្រទេសប្រជាធិបតេយ្យ និងនីតិរដ្ឋ។

សម្តេចចៅហ្វាវាំង បានផ្តាំផ្ញើដល់បងប្អូនកូនចៅទាំងអស់ ត្រូវរៀបចំឯកសារពាក់ព័ន្ធ ដូចជាអត្តសញ្ញាបណ្ណ និង លិខិត​បញ្ជាក់ពីអាជ្ញាធរ ដើម្បីអាចចូលរួមបោះឆ្នោតបាន នៅថ្ងៃទី២៣ ខែកក្កដា ឆ្នាំ២០២៣ ៕ ដោយ ៖ ហុង វាស្នា