រុស្សីបានបើកការវាយប្រហារតាមអាកាសពេញមួយយប់ទៅលើប្រទេសអ៊ុយក្រែន ដាក់គោលដៅទៅលើរដ្ឋធានី និងទីក្រុងនានាពីភាគខាងកើតទៅភាគខាងលិច ខណៈនៅប្រទេសនេះភាគច្រើនបានចំណាយពេលមួយយប់ជាមួយស៊ីរ៉ែនប្រកាសការវាយប្រហារតាមអាកាសជាច្រើនម៉ោង។

រដ្ឋបាលយោធាទីក្រុង Lviv ជាទីក្រុងមានប្រជាជនប្រហែល ៧០០.០០០នាក់ និងមានចម្ងាយ ៧០គីឡូម៉ែត្រពីព្រំដែនជាមួយប្រទេសប៉ូឡូញជាសមាជិកសម្ព័ន្ធយោធា NATO បាននិយាយថា ប្រទេសរុស្ស៊ីបានវាយប្រហារហេដ្ឋារចនាសម្ព័ន្ធដ៏សំខាន់នៅក្នុងទីក្រុងនេះ ដោយបង្កឱ្យមានអគ្គិភ័យ។

យោងតាមការរាយការណ៍បឋមបានឲ្យដឹងថា ពុំមានអ្នកស្លាប់ឬរងរបួសនោះទេ ។ លោក Yuri Malashko ប្រធានរដ្ឋបាលយោធាតំបន់ Zaporizhzhia នៅភាគអាគ្នេយ៍ប្រទេសអ៊ុយក្រែន បាននិយាយនៅលើកម្មវិធីផ្ញើសារតាមបណ្តាញ Telegram ថា ការវាយឆ្មក់របស់រុស្ស៊ីបានផ្តោតលើហេដ្ឋារចនាសម្ព័ន្ធទូរគមនាគមន៍ និងទ្រព្យសម្បត្តិវិស័យកសិកម្ម និងការធ្វើកសិកម្ម។

គ្មានអ្នកស្លាប់និងរងរបួសត្រូវបានគេរាយការណ៍នៅក្នុងតំបន់ Zaporizhzhia នោះទេ។

រដ្ឋបាលយោធារបស់ទីក្រុង Kyiv បាននិយាយថា ប្រព័ន្ធការពារដែនអាកាសរបស់ខ្លួនបានរួមចំណែកសំខាន់ក្នុងការទប់នឹងវាយប្រហារដោយយានដ្រូនរបស់រុស្ស៊ីមកលើរដ្ឋធានី និងតំបន់។