អ៊ុយក្រែន ៖ របាំងរយៈចម្ងាយខ្លី គឺជាផ្នែកមួយដ៏សំខាន់នៃបណ្តាញការពារដែនអាកាសបីស្រទាប់ ដែលអ៊ុយក្រែន​កំពុងព្យាយាម​អភិវឌ្ឍជាមួយនឹងប្រព័ន្ធលោកខាងលិចដ៏ទំនើបជាច្រើន ដើម្បីរារាំងការវាយ​ប្រហារតាម​អាកាស​របស់រុស្ស៊ី។

ប្រទេសរុស្ស៊ីបានបញ្ចេញការវាយប្រហារដោយមីស៊ីលរយៈចម្ងាយឆ្ងាយជាទៀងទាត់ និងការវាយ​ប្រហារ​ដោយ​យាន្ត​ដ្រូនចាប់តាំងពីខែតុលាមក ប៉ុន្តែបានបង្កើនការវាយប្រហារយ៉ាងធ្ងន់ធ្ងរកាលពីខែឧសភា ខណៈដែល​អ៊ុយក្រែន​បាន​រៀបចំសម្រាប់ការវាយបកក្នុងខែនេះ។

មន្ត្រីរដ្ឋធានី គីវ បាននិយាយថា ការវាយប្រហារដែលតែងតែសម្លាប់ជនស៊ីវិលនេះ យ៉ាងហោចណាស់​មួយផ្នែកមាន​គោលបំណងបំផ្លាញឃ្លាំងការពារដែនអាកាស ដូច្នេះមានប្រព័ន្ធតិចជាង​មុនអាចត្រូវបាន​ប្រើដើម្បីការពារកងទ័ព​ដែលព្យាយាមសម្រុកទៅមុខនៅក្រោមការការពារដ៏រឹងមាំនៃដែនអាកាសរុស្ស៊ី។

ការវាយប្រហារនានានៅតែរំលងតំបន់ការពារជាប្រចាំ។ កាលពីថ្ងៃពុធ (១៤ មិថុនា) ជនស៊ីវិលបីនាក់ត្រូវ​បានសម្លាប់​ក្នុងការវាយប្រហារដោយមីស៊ីលនៅទីក្រុង Odesa។ មួយថ្ងៃមុនការវាយប្រហារនោះមានមនុស្ស ១១ នាក់ត្រូវបាន​សម្លាប់នៅក្នុងការវាយប្រហារលើទីក្រុងកំណើតរបស់លោកប្រធានាធិបតី Volodymyr Zelenskiy គឺទីក្រុង គ្រីវី រី។

កាលពីខែឧសភា កងទ័ពអាកាសបានរាយការណ៍ថាបានបាញ់ទម្លាក់មីស៊ីលតម្រង់គោលដៅចំនួន១៤៩គ្រឿង យាន្តដ្រូនចំនួន៣៩៩គ្រឿង មីស៊ីលល្បឿនលឿនជាងសំឡេង គីនហ្សាល់ ចំនួន៧គ្រឿង មីស៊ីលប៉ាលិស្ទិក​ចំនួន៣គ្រឿង ព្រមទាំងមីស៊ីល Iskander ចំនួន ១១ គ្រឿងពីរប្រភេទផ្សេងគ្នា៕