បារាំង ៖​ រដ្ឋមន្ត្រីក្រសួងមហាផ្ទៃបារាំងលោក Gerald Darmanin (ហ្សេរ៉ាល់ ដាម៉ាណាំង) បាននិយាយក្នុងអំឡុង​ដំណើរ​ទស្សនកិច្ចទៅ​កាន់ទុយនីស៊ីកាលពីថ្ងៃចន្ទថា ប្រទេសបារាំងនឹងផ្តល់ថវិកាចំនួន ២៥,៨ លានអឺរ៉ូដើម្បី​ជួយប្រទេសនេះ​បញ្ឈប់ទូកដឹក​ជនអន្តោប្រវេសន៍​ឆ្លងកាត់មហាសមុទ្រមេឌីទែរ៉ាណេ។

ថវិកានេះនឹងចំណាយលើឧបករណ៍ និងការបណ្តុះបណ្តាល ហើយបន្ថែមលើកញ្ចប់ថវិកាសហភាពអឺរ៉ុបចំនួន ១០៥ លានអឺរ៉ូ ដែលប្រធាន​គណៈកម្មការសហភាពអឺរ៉ុបបានប្រកាសកាលពីដើមខែនេះ ដើម្បីជួយទុយនីស៊ី ដោះស្រាយកំណើនដ៏ខ្ពស់​នៃការចាកចេញរបស់​ជនអន្តោប្រវេសន៍។

ការឆ្លងកាត់សមុទ្រដ៏គ្រោះថ្នាក់ ដែលជារឿយៗពួកគេធ្វើដំណើរដោយទូកមានហ្វូងមនុស្សជិះប្រជៀតគ្នាច្រើន បាននាំឱ្យមានការលង់​ទឹកដ៏គួរឱ្យភ័យ​ខ្លាច ក៏ដូចជាកំណើនដ៏ធំនៃការមកដល់នៃជនអន្តោប្រវេសន៍​នៅក្នុង​ប្រទេសអ៊ីតាលីក្នុងឆ្នាំនេះ បណ្តាលឱ្យមាន​ការជាប់គាំងនយោបាយនៅអឺរ៉ុប។ ការលិចទូកកាលពីសប្តាហ៍មុនដែលដឹកជនអន្តោប្រវេសន៍រាប់រយនាក់មកពីប្រទេសលីប៊ីទៅក្រិកបានគូស

បញ្ជាក់ពីហានិភ័យនៃការឆ្លងកាត់សមុទ្រ។

ចំនួនជនអន្តោប្រវេសន៍មកពីទុយនីស៊ីក៏កំពុងកើនឡើងផងដែរ នៅពេលដែលប្រទេសនេះប្រឈមនឹងវិបត្តិសេដ្ឋកិច្ច ព្រមទាំងអាចនឹងឈាន​ដល់វិបត្តិហិរញ្ញវត្ថុសាធារណៈ។ សហភាពអឺរ៉ុបក៏បានផ្តល់ថវិកាដល់ទុយនីស៊ីប្រហែល១ ពាន់លានអឺរ៉ូដើម្បីជួយប្រព័ន្ធហិរញ្ញវត្ថុរបស់រដ្ឋ ប្រសិនបើប្រទេសនេះអនុញ្ញាតចំពោះកម្មវិធី​មូលនិធិរូបិយ​វត្ថុអន្តរជាតិ​ដែលរួមមានការកាត់បន្ថយការឧបត្ថម្ភធន និងការរៀបចំរចនាសម្ព័ន្ធ​ឡើងវិញនៃ​បណ្ដា​ក្រុមហ៊ុនដែលគ្រប់គ្រងដោយរដ្ឋ៕