យេម៉ែន ៖ ក្រុមអ្នកចិញ្ចឹមឃ្មុំយេម៉ែន តែងតែធ្វើដំណើរពីកន្លែងមួយទៅកន្លែងមួយ​នៅទូទាំងប្រទេស​ជាមួយនឹង​បង្គងឃ្មុំរបស់ពួកគេ ដើម្បីស្វែងរកស្ថានភាពអាកាសធាតុល្អបំផុតបានអត្ថប្រយោជន៍ពីរុក្ខជាតិ និងផ្កា ស្របពេលដែលអាកាសធាតុប្រែជាក្តៅខ្លាំង បណ្តាលមកពីបរិយាកាសពុំស្ថិតស្ថេរ ។

ការលំបាកដែលពួកគេប្រឈម រួមទាំងភ្លៀងធ្លាក់ប្រែប្រួល ទឹកជំនន់ដ៏គំហុក និងការឡើងសីតុណ្ហភាពខ្ពស់ នៅក្នុងប្រទេសដែលផលិតទឹកឃ្មុំ ១.៥០០តោនក្នុង១ឆ្នាំ និងផ្តល់ប្រាក់ចំណូលសម្រាប់អ្នកចិញ្ចឹមឃ្មុំប្រហែល ១០ម៉ឺននាក់ និងក្រុមគ្រួសាររបស់ពួកគេ ។

ទោះបីជាយ៉ាងណាក៏ដោយ ការផលិតទឹកឃ្មុំ បានធ្លាក់ចុះពីតួលេខរបស់រដ្ឋាភិបាលថា ប្រទេសយេម៉ែន បានផលិតទឹកឃ្មុំ ៥ពាន់តោន កាលពីឆ្នាំ ២០១២ ជាមួយនឹងប្រាក់ចំណូលប្រចាំឆ្នាំជាង ១៦លានដុល្លារនៅពេលនោះ ។

លោក Abdulghani Shamari គឺជាអ្នកចិញ្ចឹមឃ្មុំម្នាក់ក្នុងចំណោមអ្នកចិញ្ចឹមឃ្មុំរាប់ម៉ឺននាក់ផ្សេងទៀតរបស់យេម៉ែន ។ លោកដឹកបង្គងឃ្មុំរបស់លោកតាមរថយន្ត ចន្លោះទីក្រុង Sanaa និងខេត្តផ្សេងទៀត ដើម្បីស្វែងរកព្រៃដែលមានដើមឈើផ្កា ។

លោក Shamari និយាយប្រាប់ទីភ្នាក់ងារព័ត៌មានរ៉យទ័រថា ខ្ញុំតែងតែផ្លាស់ទីជានិច្ច ដើម្បីស្វែងរករុក្ខជាតិ និងផ្កាផលិត​ទឹកឃ្មុំ ។ លោកធ្វើដំណើរទៅកាន់ទីកន្លែងដែលមានភ្លៀងធ្លាក់ ។ លោកទើបតែធ្វើដំណើរមកពីខេត្ត Abyanទៅកាន់ទីក្រុង Sanaa ដោយសារតែលោកដើររកទឹកភ្លៀង ៕