ចិន ៖ អធិការបតីរបស់ប្រទេសអាល្លឺម៉ង់ លោក Olaf Scholz ធ្វើជាម្ចាស់ផ្ទះទទួលលោកនាយករដ្ឋមន្ត្រីចិន Li Qiang ដើម្បីបើកកិច្ចពិភាក្សា នៅថ្ងៃអង្គារ (ថ្ងៃទី២០ ខែមិថុនា) នេះ ក្នុងគោលបំណងស្វែងរកការស្តារឡើងវិញនូវ​កិច្ចសហប្រតិបត្តិការ រវាងប្រទេសទាំងពីរ បន្ទាប់ពីទីក្រុងប៊ែរឡាំង បានចាត់ទុកទីក្រុងប៉េកាំងថា ជា «គូប្រជែងជាប្រព័ន្ធ»។

នេះជាការធ្វើដំណើរទៅក្រៅប្រទេសជាលើកដំបូងរបស់លោក Li គិតចាប់តាំងពីលោក ត្រូវបានតែងតាំងជា​នាយករដ្ឋមន្ត្រី ក្នុងខែមីនា ហើយលោកបានបំពេញភារកិច្ចជួយពង្រឹងសេដ្ឋកិច្ចរបស់ប្រទេសចិន ក្រោយការរីករាលដាលនៃជំងឺកូវីដ។

ប៉ុន្តែមិនដូចដំណើរទស្សនកិច្ចមុនៗរបស់ឥស្សរជនជាន់ខ្ពស់ចិននោះទេ នៅពេលដែលមេដឹកនាំ​អាល្លឺម៉ង់ដែល​ពោរពេញដោយការពិចារណាហេតុផល ចង់ពង្រីកទំនាក់ទំនងធុរកិច្ចជាមួយប្រទេសយក្សរបស់អាស៊ីមួយនេះ បានស្វាគមន៍ចំពោះការមកដល់ជាផ្លូវការនេះ ដោយដំណើរទស្សនកិច្ចរបស់លោក Li បានកើតឡើងក្នុង​ខណៈ​ពេលដែលប្រទេសអាល្លឺម៉ង់កំពុងប្រញាប់ប្រញាល់ធ្វើពិពិធកម្មដៃគូពាណិជ្ជកម្មរបស់ខ្លួន។

ដោយរងគ្រោះព្រោះតែពឹងផ្អែកលើឧស្ម័នរបស់ប្រទេសរុស្ស៊ី និងដោយត្រូវបានធ្វើឲ្យរង​ទុក្ខពីការរំខាន​នៃខ្សែសង្វាក់ផ្គត់ផ្គង់ ក្នុងអំឡុងពេលជំងឺរាតត្បាត អាល្លឺម៉ង់កំពុងបង្កើនកិច្ចប្រឹងប្រែងរបស់ខ្លួន ដើម្បី «កាត់បន្ថយហានិភ័យ» ពីប្រទេសចិន។

ក្នុងជំនួបជាមួយប្រធានាធិបតីអាល្លឺម៉ង់ Frank-Walter Steinmeier កាលពីថ្ងៃចន្ទ (ទី១៩ ខែមិថុនា) លោក Li បាននិយាយថា ប្រទេសចិនបានត្រៀមរួចជាស្រេច ក្នុងការធ្វើការជាមួយអាល្លឺម៉ង់ ដើម្បីរួមចំណែកដល់«ស្ថិរភាព និងវិបុលភាពពិភពលោក»។ ប៉ុន្តែយ៉ាងណាក្ដី នៅពេលដែលលោកអង្គុយជាមួយលោក Scholz យុទ្ធសាស្ត្រសន្តិសុខជាតិដំបូងរបស់អាល្លឺម៉ង់ ដែលត្រូវបានបោះពុម្ពផ្សាយប៉ុន្មានថ្ងៃមុននឹងបង្កើតបានស្ថានភាពថ្មី។

ផែនការមេក្នុងយុទ្ធសាស្ត្រនេះ បានចោទប្រកាន់ចិនឥតប្រណីថា បានធ្វើសកម្មភាពប្រឆាំងនឹង​ផលប្រយោជន៍​របស់អាល្លឺម៉ង់ ដោយធ្វើឲ្យសន្តិសុខអន្តរជាតិ «ស្ថិតក្រោមសម្ពាធកាន់តែខ្លាំងឡើង» និងមិនយកចិត្ត​ទុកដាក់​ដល់សិទ្ធិមនុស្ស។ ប៉ុន្តែប្លង់នេះ ក៏បានគូសបញ្ជាក់ពីភាពចាំបាច់នៃការទទួល​បានកិច្ចសហប្រតិបត្តិការ​របស់ទីក្រុងប៉េកាំងលើបញ្ហាសកល ក៏ដូចជាការប្រយុទ្ធប្រឆាំងនឹងបម្រែបម្រួលអាកាសធាតុផងដែរ។

យ៉ាងណាក្ដី កិច្ចពិភាក្សា នៅថ្ងៃអង្គារនេះ រវាងរដ្ឋាភិបាលទាំងពីរ គឺជា «ការសាកល្បងយ៉ាងតឹងតែងថា តើភាពជាដៃគូពិតប្រាកដ រវាងទីក្រុងប៊ែរឡាំង និងទីក្រុងប៉េកាំង នៅតែអាចធ្វើទៅបានដែរ ឬយ៉ាងណា៕