ភ្នំពេញ៖ ឯកឧត្ដម ឧត្តមសេនីយ៍ឯក សៅ សារឿន អគ្គនាយករង អគ្គនាយកដ្ឋានយោធសេវា នាយកនាយកដ្ឋានកិច្ចការយោថា ស៊ីវិលក្រសួងការពារជាតិ បានអោយដឹងថា រយៈពេល ៩ថ្ងៃចាប់ពីថ្ងៃទី០៤ ដល់ថ្ងៃទី១១ ខែឧសភា ក្រុមការងារនាយកដ្ឋានកិច្ចការយោធាស៊ីវិល បានរួមចំណែកធ្វើប័ណ្ណចាក់វ៉ាក់សាំងជូនពលរដ្ឋនៅតំបន់ក្រហមក្នុង រាជធានីភ្នំពេញ បានជាង៣ពាន់នាក់។
ឯកឧត្ដម សៅ សារឿន បានអោយដឹងយ៉ាងដូច្នេះ ខណៈអញ្ជើញចុះពិនិត្យនិងប្រជុំដកពិសោធន៍ និងវាយតម្លៃពីលទ្ធផលដែលក្រុមការងារធ្វើប័ណ្ណចាក់វ៉ាក់សាំងកូវីដ-១៩ ជូនប្រជាពលរដ្ឋនៅតំបន់ក្រហមរបស់នាយកដ្ឋានកិច្ចការយោធាស៊ីវិល ក្រសួងការពារជាតិសម្រេចបាននារយៈពេលកន្លងមកនេះ។
នៅក្នុងឱកាសនេះ ឯកឧត្តម បានថ្លែងបញ្ជាក់ពីតួនាទីភារកិច្ចដែល ក្រុមការងារត្រូវទទួលភារកិច្ចថ្មីនេះ គឺធ្វើយ៉ាងឲ្យសម្រេចបានជោគជ័យទៅតាមផែនការដែលថ្នាក់ដឹកនាំប្រគល់ជូន ហើយឯកឧត្ដម ក៏បានវាយតម្លៃពីការខិតខំរបស់នាយ ពលទាហានទាំងអស់ដែលជាលទ្ធផលក្រុមការងាររៀបចំប័ណ្ណចាក់វ៉ាក់សាំងកូវីដ-១៩ របស់នាយកដ្ឋានកិច្ចការយោធាថា ស៊ីវិលសម្រេចបានក្នុងរយៈពេល៩ថ្ងៃ កន្លងមកប្រកបដោយការយកចិត្ត ទុកដាក់ ស្មារតី ទទួលខុសត្រូវ។
គិតចាប់ពីថ្ងៃទី៤ ឧសភា ដល់ថ្ងៃទី១១ ឧសភា លើទិន្នន័យចូលមកចំនួន ១២.៨៦២នាក់ ជាប្រជាពលរដ្ឋ និងកម្មរ និយោជិតដែលរស់នៅក្នុងសង្កាត់ស្ទឹងមានជ័យទី២ ស្ទឹងមានជ័យទី៣ ក្នុងខណ្ឌមានជ័យ ក្រុមការងារនាយកដ្ឋានយោធាស៊ីវិលបានបញ្ជូល ទិន្នន័យបាន ៥៨០៩ នាក់ ផ្ទៀងទិន្នន័យបាន ៤.៣២៦ នាក់ អនុម័តទិន្នន័យបានចំនួន ៣.៨៧៥នាក់។ ទន្ទឹមនឹងលទ្ធផលទទួល បានខាងលើឯកឧត្ដម ប្រធានក្រុមការងារ បានបញ្ជាក់ពីចំណុចខ្វះខាតមួយចំនួនក្នុងពេលបំពេញការងារ ព្រមទាំងមានកិច្ចសហការជាមួយនាយកដ្ឋានបញ្ជូនសារ ដើម្បីជួយដោះស្រាយជាបន្តបន្ទាប់ ក្នុងករណីរូបពាក់ម៉ាស់ គ្មានរូបថត គ្មានអត្តសញ្ញាណប័ណ្ណជាដើម។ ជាទិសដៅដែលត្រូវអនុវត្តផែការបន្តក្រុមការងារ នាយកដ្ឋានបានទទួលខុសត្រូវក្នុងបញ្ជូលទិន្នន័យផ្ទៀងទិន្នន័យ និងអនុម័តទិន្នន័យជូនបងប្អូនប្រជាពលរដ្ឋ និងកម្មករ និយោជិត ដែលទទួលវ៉ាក់សាំងការពារជំងឺកូវីដ១៩ រួចដែល រស់នៅក្នុងសង្កាត់កាកាបទី១ សង្កាត់កាកាបទី២និងសង្កាត់ ត្រពាំងក្រសាំង ក្នុងខណ្ឌពោធិ៍សែនជ័យ រាជធានីភ្នំពេញ។
ឯកឧត្តម បានថ្លែងកោតសរសើរ និងវាយតម្លៃខ្ពស់ចំពោះ ថ្នាក់ដឹកនាំ ព្រមទាំងក្រុមការងារ ទាំងអស់ក្រោយពីទទួល បានបទបញ្ជាដ៏ខ្ពង់ខ្ពស់ពីប្រមុខការពារជាតិ ក្រុមការងារយើងបានសហការយ៉ាងល្អជាមួយក្រុមការងារនាយកដ្ឋានបុគ្គលិក និងនាយកដ្ឋានបញ្ជូនសារបានសម្រេចទៅតាមផែនការប្រកបដោយការទទួលខុសត្រូវខ្ពស់ក្នុងការបញ្ជូលទិន្នន័យ ផ្ទៀងទិន្នន័យ និងអនុម័តទិន្នន័យ ជូនបងប្អូនប្រជាពលរដ្ឋ និងកម្មករ និយោជិត នារយៈពេលកន្លងមកនេះ។ កត្តាទាំងនេះ បានធ្វើឲ្យថ្នាក់ដឹកនាំនិងយោធិនគ្រប់រូបក្នុងនាយកដ្ឋានយើងនេះ មានកិត្តិយស និងមោទនាភាព យ៉ាងក្រៃលែងចំពោះការជឿទុកចិត្តពីប្រមុខដឹកនាំដែលជាប្រភពកម្លាំងធនធានមនុស្ស ដ៏ល្អក្នុងការចូលរួមបំរើនៅ គ្រប់គោលនយោបាយរបស់កងយោធពលខេមរភូមិន្ទ និងក្នុងស្រទាប់មហាជនផងដែរ។ ពិសេសក្រុមការងារយើងបានចូលរួមបំរើក្នុងងយុទ្ធនាការចាក់វ៉ាក់សាំងកូវីដ-១៩ ទ្រង់ទ្រាយធំក្នុងភូមិសាស្ត្ររាជធានីភ្នំពេញ ដែលប្រតិបត្តិការដោយកម្លាំងក្រុមគ្រូពេទ្យរបស់កងយោធពលខេមរៈភូមិន្ទ ចុះធ្វើការចាក់ជូនបងប្អូនប្រជាពលរដ្ឋ និងកម្មករ និយោជិត ក្នុងតំបន់ក្រហម តំបន់លឿងទុំ និងតំបន់លឿង ក្នុងខណ្ឌចំនួន៤ ពិសេសត្រូវចូលរួមឲ្យបានជាប្រចាំក្នុងការអនុវត្តនូវវិធានការនានាពីក្រសួងសុខាភិបាល និងពីរាជរដ្ឋាភិបាល ដោយវិធានការ ៣ការពារ ៣កុំ គឺត្រូវ ពាក់ម៉ាស់ និងរក្សាគម្លាត សវត្ថិភាពពីបុគ្គលទៅបុគ្គល។
យុទ្ធនាការចាក់វ៉ាក់សាំងជូនប្រជាពលរដ្ឋនៅក្នុងតំបន់ក្រហម តំបន់លឿងទុំ និងតំបន់លឿង ដែលជាតំបន់ឆ្លងរីករាលដាលខ្លាំងនៃខ្សែរយៈចម្លងជំងឺកូវីដ-១៩នោះ គឺជាការគិតគូរខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីឱ្យប្រជាពលរដ្ឋនៅក្នុងតំបន់រងហានិភ័យ ខ្ពស់នឹងការឆ្លងជំងឺខ្លាំងនេះ ទទួលបានវ៉ាក់សាំងការពារសុខភាពរបស់ពួកគេពីការវាយប្រហារដោយមេរោគដ៏សាហាវកូវីដ១៩៕ អត្ថបទ៖ សុទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
