កំពង់ឆ្នាំង ៖ ពេញមួយថ្ងៃនាថ្ងៃទី២០ ខែមិថុនា ឆ្នាំ២០២៣នេះ ប្រជាពលរដ្ឋប្រមាណ​ជាង​៤០០​នាក់​ រស់នៅក្នុងឃុំតាជេស ស្រុកកំពង់ត្រឡាច ខេត្តកំពង់ឆ្នាំង បានទទួលការ​ពិនិត្យ និង​ព្យាបាល​ជំងឺ​​ដោយ​ក្រុមគ្រូពេទ្យបង្អែកខេត្ត។ ប្រជាពលរដ្ឋបានសំដែងការអរគុណដល់សម្តេចតេជោ ហ៊ុន សែន ដែល​បានយចិត្តទុកដាក់លើសុខុមាលភាពប្រជាពលរដ្ឋគ្រប់ទីកន្លែង និងគ្រប់ពេលវេលា ដើម្បី​ធានា​សង្គមឲ្យកាន់តែមានភាពប្រសើរឡើង ។

តំណាងប្រជាពលរដ្ឋបានអោយដឹងថា ពួកគាត់ពិតជាសប្បាយចិត្តណាស់ ក្រោយ​ឃើញ​វត្ត​មាន​របស់​ក្រុម​គ្រូពេទ្យជំនាញនៃមន្ទីរពេទ្យបង្អែកខេត្តកំពង់ឆ្នាំង ដែលដឹកនាំដោយលោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង, និងលោកវេជ្ជបណ្ឌិត ទុំ សម្បត្តិ ប្រធាន​មន្ទីរ​ពេទ្យ​បង្អែក​ខេត្ត ចុះមកពិនិត្យព្យាបាលជូនប្រជាពលរដ្ឋដល់មូលដ្ឋានបែបនេះ ដោយមិនគិតសេវា ឬ​ប្រាក់​កម្រៃអ្វីឡើយ។ ការចុះមកពិនិត្យព្យាបាលជូនប្រជាពលរដ្ឋបែបនេះ គឺប្រជា​ពលរដ្ឋ​ទាំងអស់​ទទួល​បាន​ប្រយោជន៍ច្រើនណាស់ គឺមិនចាំបាច់​ចំណាយ​ថវិកា​ក្នុង​ការ​ធ្វើ​ដំណើរ​ទៅ​កាន់​មន្ទីរ​ពេទ្យ មិនបាច់ធ្វើដំណើរឆ្លងកាត់គ្រោះថ្នាក់តាមផ្លូវ មិនបាច់ចំណាយថវិការលើថ្នាំសង្កូវ និង​បាន​ប្រាស្រ័យ​ទាក់ទងគ្នាល្អជាមួយក្រុមគ្រូពេទ្យទាំងអស់ទៀតផង។

លោកវេជ្ជបណ្ឌិត ប្រាក់ វ៉ុន បានឱ្យដឹងថា នៅថ្ងៃនេះ ក្រុមគ្រូពេទ្យ​ជំនាញ​នៃ​មន្ទីរសុខាភិបាល​ខេត្តកំពង់ឆ្នាំង រួមនឹងរថយន្តគ្លីនិក ដែលភ្ជាប់ជាមួយឧបករណ៍បរិក្ខាពេទ្យទំនើប បា​ន​ចុះ​មក​ពិនិត្យ​ និង​ព្យាបាលជំងឺជូនប្រជាពលរដ្ឋដោយឥតគិតថ្លៃ ការនាំយក​នូវ​សេវា​សុខាភិបាល​មក​ដល់​មូលដ្ឋាន ដើម្បីចូលរួមលើកកម្ពស់សុខមាលប្រជាពលរដ្ឋឱ្យកាន់តែប្រសើរឡើង ។ នៅ​ក្នុង​ការ​ផ្តល់​សេវា​សុខាភិបាលនៅមូលដ្ឋាននេះ គឺក្រុមគ្រូពេទ្យ​បង្អែក​ខេត្ត​បាន​ធ្វើ​មួយ​ចំណែក​រួច​មក​ហើយ ដូចជានៅតាមមណ្ឌលសុខភាព មន្ទីរពេទ្យបង្អែកស្រុកប្រតិបត្តិ ចំពោះ​ការ​ចុះ​មក​ពេល​នេះ ដើម្បី​ផ្តល់​នូវ​ភាព​ងាយ​ស្រួល​បន្ថែម​ទៀត​ជូន​ប្រជាពលរដ្ឋ​ធ្វើ​យ៉ាង​ណា​ឱ្យ​សុខ​ភាព​ប្រជាពលរដ្ឋ​កាន់​តែភាពប្រសើរឡើងថែមទៀត និងបានចូលរួមកាត់​បន្ថយ​ជា​មួយ​ការ​ចំណាយ​ផង​ដែរ៕ អត្ថបទ៖ ហុង វាស្នា