ក្លិបញញួរធំ West Ham United ជាថ្មីម្តងទៀតបានបដិសេធសំណើទី ២ របស់ Arsenal ក្នុង​ការ​ចង់​បានខ្សែបម្រើអង់គ្លេស Declan Rice។

សំណើនៃការចង់បានរបស់ Declan Rice លើកនេះត្រូវបានគេដឹងថា Arsenal ហ៊ានឱ្យ​ថ្លៃ​ដល់​ទៅ ៩០លានផោនរួមជាមួយនឹងប្រាក់បន្ថែមផ្សេងៗ តែបើគិតជាតម្លៃផ្ទេរជាគោលគឺ ៧៥ លានផោន។

ប្រធានក្លិប West Ham លោក David Sullivan ធ្លាប់បាននិយាយថា លោកមានជំនឿ ៩៩% ថា Declan Rice ដែលជួយក្រុមឈ្នះជើងឯក Europa Conference League នោះ នឹងចាកចេញ​ពី​ក្លិប​នៅ​រដូវក្តៅខាងមុខ។

យ៉ាងណាក្តី ទំនិញល្អ អតិថិជនកាន់តែចង់បាន អ្នកលក់កាន់តែតម្លើងថ្លៃ ស្របពេល West Ham សម្លឹងឃើញថា អាចទាមទាបានលើសនេះសម្រាប់ការផ្ទេរកីឡាករវ័យ ២៤ ឆ្នាំរូបនេះ។

សូមរំលឹកថា Declan Rice បានបង្ហាញខ្លួនសរុបឱ្យ West Ham ២៤៥ ប្រកួតរកបាន ១៥ គ្រាប់ បន្ទាប់ពីចាប់ផ្តើមអាជីពដំបូងនៅរដូវកាល ២០១៦-១៧ ក្រោយងើប​ពី​ថ្នាល​យុវជន​របស់​ក្លិប​តែ​ម្តង។

Rice បង្ហាញខ្លួនឱ្យក្រុមជម្រើសជាតិអង់គ្លេស ៤១ លើក និងបង្ហាញខ្លួនពេញទាំង ៥ ប្រកួត​របស់​អង់គ្លេស​ផងដែរនៅ World Cup ២០២២ ឆ្នាំមុន៕ អត្ថបទ៖នាង សុភាវុធ