ភ្នំពេញ៖ ក្រសួងសាធារណការ និងដឹកជញ្ជូនបានប្រគល់ថវិកាមូលនិធិសប្បុរសធម៌ ដែលប្រមូលបានពីកម្មវិធីខួប៣ឆ្នាំ ផ្លាកលេខពិសេសផ្ទាល់ខ្លួន និងរថយន្ត ជូនដល់មន្ទីរពេទ្យគន្ធបុប្ផា និងមន្ទីរពេទ្យកុមារជាតិ។

ថវិកាមូលនិធិសប្បុរសធម៌ចំនួន ២០ម៉ឺនដុល្លាសហរដ្ឋអាមេរិក ដែលប្រមូលបានពីកម្មវិធីខួប ៣ឆ្នាំ ផ្លាកលេខពិសេសផ្ទាល់ខ្លួន និងរថយន្ត ដែលបានប្រព្រឹត្តទៅកាលពីថ្ងៃទី៧ ទី៨ ខែមីនា ឆ្នាំ២០២៣កន្លងទៅ ត្រូវបានប្រគល់ជូនដល់មន្ទីរពេទ្យគន្ធបុប្ផា និងមន្ទីរពេទ្យកុមារជាតិ នាព្រឹកថ្ងៃទី២១ ខែមិថុនា ឆ្នាំ២០២៣ ក្រោមអធិបតីភាពឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ​និងតំណាងនៃមន្ទីរពេទ្យទាំង២ នៅទីស្តីការក្រសួងសាធារណការ។

ឯកឧត្តមទេសរដ្ឋមន្ត្រី ស៊ុន ចាន់ថុល បានឲ្យដឹងថា ការប្រគល់ថវិកាមូលនិធិសប្បុរសធម៌​នាពេលនេះ ​គឺដោយទទួលបាននូវការឯកភាពដ៏ខ្ពង់ខ្ពស់ពីសម្ដេចតេជោ ហ៊ុន សែន ​នាយករដ្ឋមន្ត្រី ដែលបាន​អនុញ្ញាតឲ្យគណៈកម្មការគ្រប់គ្រងការលក់លេខចុះបញ្ជីរថយន្តពិសេស យកថវិកា​ដែលបានមកពីការរៀបចំខួប ៣ឆ្នាំ ការដាក់លក់ផ្លាកលេខពិសេសផ្ទាល់ខ្លួននេះ ប្រគល់ជូន​មន្ទីរពេទ្យគន្ធបុប្ផាចំនួន ១០ម៉ឺនដុល្លារ និងមន្ទីរពេទ្យកុមារជាតិចំនួន១០ម៉ឺនដុល្លារ ដើម្បី​ចូលរួមចំណែកក្នុងការពិនិត្យ និងការព្យាបាលជំងឺកុមារនៅកម្ពុជា។

សូមជម្រាបជូនថា កាលពីថ្ងៃទី០៧ ខែមករា ឆ្នាំ២០២០ កន្លងទៅក្រសួងសាធារណការ ​និងដឹក ជញ្ជូន​បានបើកឲ្យដំណើរការជាផ្លូវការនៃការលក់លេខចុះបញ្ជីពិសេសផ្ទាល់ខ្លួន​សម្រាប់​រថយន្តដែលមានលក្ខណៈពិសេសអាច​កុម្ម៉ង់​តាមការពេញចិត្ត ​ដើម្បីបំពេញតម្រូវការ និងផ្តល់​ជម្រើសសំបូរបែបជូនប្រជាពលរដ្ឋ ហើយផ្លាកលេខប្រភេទនេះ​បង្ហាញពីអត្តសញ្ញាណកម្ពុជា​លើ​ឆាកអន្តរជាតិ ​អាចកៀរគរ​ចំណូលបន្ថែមជូនរដ្ឋ និងអាចអនុញ្ញាត​ឲ្យម្ចាស់រថយន្តរក្សា​លេខនោះទុក​សម្រាប់ចុះបញ្ជីលើរថយន្តថ្មីរបស់ខ្លួននាពេលក្រោយៗទៀតបានផងដែរ៕អត្ថបទ ៖ ប្រាក់ វ៉ាន់ដា