កណ្ដាល៖ ភូមិសាស្ត្រក្រុងតាខ្មៅ លែងមាន«តំបន់ក្រហម»ទៀតហើយ បន្ទាប់ពីរដ្ឋបាលខេត្តនេះសម្រេចកែប្រែភូមិសាស្ត្រក្រុងមួយនេះទៅជា«តំបន់លឿងទុំ» និង«តំបន់លឿង»។
ក្នុងសេចក្ដីសម្រេចនៅថ្ងៃនេះ អភិបាលខេត្តកណ្ដាល លោក គង់ សោភ័ណ្ឌ បានកំណត់ភូមិសាស្ត្រក្រុងតាខ្មៅទៅជា«តំបន់លឿងទុំ» ដែលសំដៅដល់តំបន់ប្រឈមមុខនឹងការឆ្លងរីករាលដាលនៃមេរោគកូវីដ-១៩កម្រិតមធ្យម និង«តំបន់លឿង» ដែលសំដៅដល់តំបន់កំពុងប្រឈមមុខនឹងការឆ្លងរីករាលដាលនៃមេរោគកូវីដ-១៩កម្រិតស្រាល។
បើតាមសេចក្ដីសម្រេចដដែលនេះ អគារវប្បធម៌ស្ថិតក្នុងភូមិតាខ្មៅ២ នៃសង្កាត់តាខ្មៅ ត្រូវបានកំណត់ជា«តំបន់លឿងទុំ» ខណៈសង្កាត់ដើមមៀន និងសង្កាត់តាខ្មៅ ដែលធធ្លាប់ជា«តំបន់លឿងទុំ»នោះ ត្រូវបានកំណត់ជាតំបន់លឿងវិញ។
សម្រាប់«តំបន់លឿងទុំ» អាជ្ញាធរខេត្តកណ្ដាលសម្រេចហាមឃាត់បុគ្គលគ្រប់រូបមិនឱ្យធ្វើដំណើរចាកចេញពីលំនៅឋាន ឬទីស្នាក់អាស្រ័យបច្ចុប្បន្នរបស់ពួកគេនោះឡើយ ប៉ុន្តែ ក៏បានផ្ដល់ការលើកលែងសម្រាប់ករណីចាំបាច់ និងបន្ទាន់មួយចំនួនផងដែរ។
អាជ្ញាធរខេត្តកណ្ដាលក៏បានហាមឃាត់ផងដែរនូវសកម្មភាពការងារ ការប្រកបមុខរបរ និងអាជីវកម្មទាំងអស់ដែលត្រូវបានចាត់ទុកថា«មិនមែនជាតម្រូវការចាំបាច់ប្រចាំថ្ងៃ»។
ចំណែកឯការជួបជុំ ឬការប្រមូលផ្ដុំមនុស្ស បន្តស្ថិតក្រោមការហាមឃាត់បន្តទៀត លើកលែងតែការជួបជុំលក្ខណៈគ្រួសារ ឬការជួបជុំចាំបាច់មួយចំនួនប៉ុណ្ណោះ។
បើតាមសេចក្ដីសម្រេចនេះ វិធានការថ្មីនេះ ត្រូវអនុវត្តសម្រាប់រយៈពេល ១សប្ដាហ៍ចាប់ពីថ្ងៃស្អែកនេះតទៅរហូតដល់ថ្ងៃទី១៩ ខែឧសភានេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
