ឯកឧត្តម ឃួង ស្រេង ជំរុញឲ្យអធិការដ្ឋាន និង​ស្នងការដ្ឋាន​រាជ​ធានី​ភ្នំពេញ​ធ្វើ​អត្ត​សញ្ញាណ​ប័ណ្ណ​ជូន​ប្រជាពលរដ្ឋ​ឲ្យបានលឿន ខណៈដែលការបោះឆ្នោតបានខិតជិតមកដល់ ។

ក្នុងឱកាសអញ្ជើញដឹកនាំកិច្ចប្រជុំបូកសរុបលទ្ធផលការផ្ដល់អត្តសញ្ញាណប័ណ្ណសញ្ជាតិខ្មែរ កាល​ពី​ព្រឹក​ថ្ងៃ​ទី២១ ខែមិថុនា ឆ្នាំ២០២៣ នៅសាលារាជធានីភ្នំពេញ ឯកឧត្តម ឃួង ស្រេង អភិបាល​រាជ​ធានី​ភ្នំពេញ បានជំរុញឲ្យស្នងការដ្ឋាននគរបាលរាជធានីភ្នំពេញ បញ្ចេញ​ឈ្មោះ​ប្រជាពលរដ្ឋ​ដែល​មាន​អត្តសញ្ញាណប័ណ្ណហួសសុពលភាពបញ្ជូនទៅអធិការខណ្ឌ និងអភិបាលខណ្ឌទាំង១៤ ដើម្បី​សាវជ្រាវធ្វើអត្តសញ្ញាណប័ណ្ណទាំងនេះជូនប្រជាពលរដ្ឋឡើងវិញ។

ចំពោះ​ការ​ធ្វើ​អត្ត​សញ្ញាណ​ប័ណ្ណ​ដែលហួសសុពលភាពនេះ បើធ្វើមិនទាន់មុនពេលបោះឆ្នោតទេ អាជ្ញាធរ​ខណ្ឌ​ទាំង​១​៤ ត្រូវណែនាំទៅសង្កាត់ ដើម្បី​ធ្វើ​លិខិត​បញ្ជាក់​អត្ត​សញ្ញាណ​សម្រាប់​ការ​បោះឆ្នោត​ជូន​ដល់​ប្រជាពលរដ្ឋ មានន័យថា នៅពេលដែលអត្តសញ្ញាណប័ណ្ណធ្វើមិនបានរួចរាល់ ពលរដ្ឋ​នៅ​តែ​អាច​បោះ​ឆ្នោត​បាន ។ បន្ថែមពីនេះ ឯកឧត្តម ឃួង ស្រេង ក៏បានណែនាំ​ឲ្យ​រដ្ឋបាល​រាជធានី​ភ្នំពេញ​ធ្វើ​លិខិត ដើម្បីរំលឹកដល់ប្រជាពលរដ្ឋ ដែលមានកូនអាយុ១៥ឆ្នាំហើយ ត្រូវនាំ​កូន​ទៅ​ធ្វើ​អត្ត​សញ្ញាណ​ប័ណ្ណ កុំចាំពេលដែលត្រូវការទើបសម្រុកទៅធ្វើអត្តសញ្ញាណប័ណ្ណនោះ។

ឯកឧត្តម ឃួង ស្រេង ក៏បានធ្វើការណែនាំអាជ្ញាធរខណ្ឌទាំង១៤ ជួយ​ជំរុញ​ប្រជាពលរដ្ឋ​ឲ្យ​ភ្ជាប់​ប្រព័ន្ធ​តេឡេក្រាម ជាមួយសម្ដេចតេជោ ហ៊ុន សែន និងរដ្ឋបាលរាជធានីភ្នំពេញ ដើម្បីឲ្យ​ប្រជាពលរដ្ឋ​បាន​ទទួលព័ត៌មានជាក់លាក់ជៀសវាងការជឿញុះញង់ពីពួកអគតិមួយចំនួន។

ស្នងការរងរាជធានីភ្នំពេញបានឲ្យដឹងថា គិតពីឆ្នាំ២០១២ រហូតមកដល់ឆ្នាំ២០២៣នេះ នគរបាល​រាជធានីបានផ្ដល់អត្តសញ្ញាណប័ណ្ណជូនប្រជាពលរដ្ឋនៅភ្នំពេញ ចំនួនជាង ១លាន​៦​ម៉ឺន​សន្លឹក។ តាមទិន្នន័យដែលអាចព្យាករណ៍បាននៅឆ្នាំ២០២៤ អត្តសញ្ញាណ​ប័ណ្ណ​ប្រជាពលរដ្ឋ​នៅ​ភ្នំពេញ ដែលអស់សុពលភាពមានចំនួន ១៣២ ១០៣ សន្លឹក នៅឆ្នាំ​២០២៥ អត្ត​សញ្ញាណ​ប័ណ្ណ​អស់​សុពលភាព ចំនួន ៣៤៩ ២១៨ សន្លឹក នៅឆ្នាំ២០២៦ អត្ត​សញ្ញាណ​ប័ណ្ណ​អស់​សុពលភាព ចំនួន ២៧៦ ៧៦២ សន្លឹក និងនៅឆ្នាំ២០២៧អត្តសញ្ញាណប័ណ្ណអស់សុពលភាព ចំនួន ២៧ ៤៣៦ សន្លឹក ៕ អត្ថបទ៖ ប្រាក់ វ៉ាន់ដា