ភ្នំពេញ៖ ពលរដ្ឋរស់នៅក្នុងមូលដ្ឋានខណ្ឌទួលគោក បានបង្ហាញការយល់ឃើញថា ការដែល​អាជ្ញាធរ​បានរៀបចំ​វេទិកាសាធារណៈដើម្បីពិគ្រោះយោបល់ គឺបានផ្តល់ឱកាសសម្រាប់ពួកគាត់​ទាំងអស់គ្នាប្រាប់ពីទុក្ខលំបាកនានា ​ក៏ដូចជាការលើកឡើងនូវសំណើរសំណូមពរ ដើម្បីអាចអោយ​អាជ្ញាធរជួយដោះស្រាយ និងបំពេញរាល់តម្រូវការផ្សេងៗទៀតផងដែរ ។

ការលើកឡើងរបស់ពលរដ្ឋ ក្នុងគ្រាដែលពួកគាត់បានទៅចូលរួម ក្នុងការបើកវេទិការផ្សព្វផ្សាយ និងពិគ្រោះយោបល់ របស់ក្រុមប្រឹក្សាខណ្ឌ អាណត្តិទី៣ នៅព្រឹកថ្ងៃទី២១ ខែមិថុនា ឆ្នាំ២០២៣នេះ ក្រោមវត្តមានឯកឧត្តម នាង ផាត​ អនុប្រធានក្រុមការងាររាជរដ្ឋាភិបាល​ ចុះពង្រឹងខណ្ឌទួលគោក និងលោក ម៉ែន សិរី ប្រធានក្រុមប្រឹក្សាខណ្ឌទួលគោក , លោកជា ពិសី ​អភិបាលខណ្ឌទួលគោក និងមានការចូលរួមពីប្រជាពលរដ្ឋជាច្រើន ​មកពីតាមបណ្តាសង្កាត់ទាំង១០ ក្នុង​ខណ្ឌទួលគោក ។

ពលរដ្ឋសប្បាយរីករាយពេលមានការរៀបចំវេទិកាបែបនេះ​ឡើងមក ហើយវាជាការ​ជួយជម្រុញ​នូវ​រាល់បញ្ហាទាំងអស់​ អាចបានទៅដល់អាជ្ញាធរ ​ក្នុងការទទួលយកទៅពិភាក្សា ​និងរកដោះស្រាយ ។

សូមបញ្ជាក់ថា នៅក្នុងវេទិកាខាងលើ អាជ្ញាធរបានអនុញ្ញាតអោយពលរដ្ឋដែលបានចូលរួម អាចឡើង​និយាយដោយផ្ទាល់ ពីបញ្ហា​ និងទុក្ខលំបាកដែលកំពុងប្រឈម ឬ​ក៏អាច​សរសេរ​លើ​ក្រដាស​ដាក់ចូលក្នុងប្រអប់ព័ត៌មានក៏បាន ​ដើម្បីក្រុមការងារអាជ្ញាធរ ​យកមកពិនិត្យ និង​ដោះស្រាយជូន ។

ក្នុងពិធីនោះដែរ ឯកឧត្តម នាង ផាត ​បានធ្វើការណែនាំខ្ពស់ដល់ក្រុមអាជ្ញាធរនៅថ្នាក់មូលដ្ឋានខណ្ឌ ត្រូវបានយកចិត្តទុកដាក់អោយបានខ្ពស់បំផុត ក្នុងការជួយដោះស្រាយនូវ​រាល់​បញ្ហា និង​សុខទុក្ខលំបាក​របស់ពលរដ្ឋ ​ពិសេសនោះ ​ក្រោយ​ការ​បើក​វេទិកា​នេះរួច គឺ​មាន​សំណើរ​សំណូម​ពរជាច្រើន ​ដែល​ទាមទារ​អោយអាជ្ញាធរត្រូវចាំបាច់ធ្វើការដោះស្រាយ ។

ឯកឧត្តម បន្តថា អាជ្ញាធរមិនត្រូវទុកបញ្ហារបស់ពលរដ្ឋចោលនោះទេ គឺ​ត្រូវ​គិតគូរ​ពិភាក្សា​ដើម្បី​ដោះស្រាយ ហើយប្រសិនបើរឿងណាផុត​លទ្ធភាព​ ឬដែន​សមត្ថកិច្ចរបស់អាជ្ញាធរថ្នាក់​ខណ្ឌនោះ គឺ​ត្រូវ​រាយការណ៍​មក​ថ្នាក់​លើ​បន្ថែម ដើម្បីបន្ត​រិះរក​យន្តការ​ដោះស្រាយ​ជូន​ពលរដ្ឋអោយខាងតែបាន ៕ អត្ថបទ ៖ លីហេង