ភ្នំពេញ ៖ ក្រសួងធម្មការនិងសាសនា នៃព្រះរាជាណាចក្រកម្ពុជា ព្រឹកថ្ងៃទី២១ ខែមិថុនា ឆ្នាំ២០២៣នេះ បានរៀបចំ​បើក​សិក្ខាសាលា​ស្តីពី កិច្ចសន្ទនាអន្តរជំនឿសាសនាដើម្បីសុខដុមនីយកម្មសាសនា នៅកម្ពុជា ឆ្នាំ២០២៣ ក្រោម​ប្រធានបទ៖ "សាសនិករួមគ្នាបង្កើនការអភិវឌ្ឍន៍ជាតិ កិច្ចគាំពារសុខសន្តិភាពនិងសេរីភាព​ខាងជំនឿ​សាសនានៅ​កម្ពុជា"។

​ឯកឧត្តម ស៊ិន សុវណ្ណនិ អគ្គនាយកកិច្ចការសាសនា បានលើកឡើងថា ព្រះពុទ្ឋសាសនា: ប្រទេសកម្ពុជាបច្ចុប្បន្ន គោរពពុទ្ឋសាសនាថេរវាទនិងមាននិកាយចំនួន២គឺ (១) គណៈមហានិកាយ និង(២) គណៈធម្មយុត្តិកនិកាយ ។ គណៈមហានិកាយមានវត្តចំនួន៤,៨៦៦វត្ត មានព្រះសង្ឃសរុបចំនួន៦៦,៦០៩អង្គ ក្នុង នោះភិក្ខុ​ចំនួន២១,០៦៣​អង្គនិងសាមណេរចំនួន៤៥,៥៤៦អង្គ។ គណៈធម្មយុត្តិកនិកាយចំនួន២៦៧វត្ត មានព្រះសង្ឃ សរុបចំនួន២,៣៥៨អង្គ ក្នុងនោះភិក្ខុមានចំនួន៥៦១អង្គ និងសាមណេរចំនួន ១,៧៩៧អង្គ ។ អាស្រមមានចំនួន ១៤០ និងមណ្ឌលវិបស្សនា​ចំនួន៤៤ ។ វត្តសរុបមានចំនួន ៥,១៣៣វត្ត និងព្រះសង្ឃសរុបចំនួន ៦៨,៩៦៧អង្គ ។

ពាហិរសាសនា: ក្រៅពីព្រះពុទ្ឋសាសនា រាជរដ្ឋាភិបាលកម្ពុជា បានបំពេញភារកិច្ចប្រកបដោយការយក​ចិត្តទុកដាក់​ខ្ពស់ និងធ្វើយ៉ាងណាឱ្យមានសុខដុមនីយកម្មសាសនា និងសិទ្ធិសេរីភាពខាងជំនឿសាសនាដូចមានចែង ក្នុងរដ្ឋធម្មនុញ្ញនៃព្រះរាជាណាចក្រកម្ពុជា។ ដោយក្នុងនោះវិស័យ ពាហិរសាសនា ក៏មានការរីកចម្រើនគួរឱ្យ​កត់សម្គាល់ដូចតទៅ៖ - ឥស្លាមសាសនា ដែលបច្ចុប្បន្នមាន វិហារ (ម៉ាស្ជិទ) ចំនួន ៥៩៣ កន្លែង, ស៊ូរ៉ាវ មានចំនួន ៨២៨កន្លែង, សាលាបង្រៀនសាសនា មានចំនួន ៥៩៨ កន្លែង, ដែលមានបរិស័ទសរុបចំនួន ៥៣៧,៣៧០នាក់ និងមានអង្គការ សមាគមចរិត ឥស្លាមសាសនាចំនួន ៥០កន្លែង ។ គ្រិស្តសាសនា មានវិហារចំនួន ៦០១ កន្លែង, ស្នាក់ការថ្វាយបង្គំមានចំនួន ១,៥២២កន្លែង, និងសាលាបង្រៀនសាសនា មានចំនួន៨៨៣កន្លែង, សរុបបរិស័ទ ចំនួន១០៩,៧៥២ នាក់។ សាសនាមហាយាន មានកន្លែងថ្វាយបង្គំចំនួន២០៣កន្លែង, បរិស័ទចំនួន២២,២៩៦នាក់, សាសនាបាហៃ មានកន្លែងថ្វាយបង្គំ២៦កន្លែង, បរិស័ទចំនួន២,៩៩១នាក់, សាសនាកៅដាយនិងសាសនា​ផ្សេងៗទៀត មានកន្លែង ថ្វាយបង្គំចំនួន៣កន្លែង, បរិស័ទចំនួន៤៦នាក់ នាឱកាសនោះឯកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនា បានថ្លែងថា រាជរដ្ឋាភិបាល នៃព្រះរាជាណាចក្រកម្ពុជា បានយកចិត្តទុកដាក់ និងផ្តល់តម្លៃដ៏ឧត្តង្គឧត្តមបំផុតដល់វិស័យសាសនា ដើម្បីជំរុញដល់ការរីកចម្រើននិងអភិវឌ្ឍន៍រួមគ្នា ព្រមទាំងបំពេញ​ឱ្យគ្នាទៅវិញទៅមក។ វិស័យសាសនានេះបានរួមចំណែកយ៉ាងសកម្មក្នុងការអភិរក្ស ការអភិវឌ្ឍ និងការ​រក្សា​នូវ​សុខសន្តិភាព សម្រាប់សង្គមជាតិទាំងមូល។ គ្រប់សកម្មភាពមេដឹកនាំសាសនាទាំងអស់សុទ្ធតែបាន ចូលរួមចំណែក ជួយដល់សង្គម និងប្រទេសជាតិ ពិសេស ក្នុងអំឡុងពេលពិភពលោកទាំងមូលកំពុងតែប្រឈមមុខ នឹងជំងឺកូវីដ-១៩ ដោយបានចូលរួមចំណែកអប់រំ ទូន្មាននិងជម្រុញឱ្យបរិស័ទរបស់ខ្លួន បានយល់ដឹងអំពីវិធីសាស្ត្រ ក្នុងការការពារ ដោយអនុវត្តវិធានការសុខាភិបាលយ៉ាងខ្ជាប់ខ្ជួន ព្រមទាំងចូលរួមចាក់វ៉ាក់សាំងបង្ការ និងទប់ស្កាត់ ជម្ងឺកូវីដ-១៩នេះ ឱ្យបានគ្រប់ៗគ្នា មួយវិញទៀតសាសនា ក៏បានផ្តល់ការអប់រំ និងអំពីផលវិបាក នៃការប្រើប្រាស់ គ្រឿងញៀន ការមិនគោរពច្បាប់ចរាចរណ៍ ការប្រើអំពើហិង្សា ការបំលាស់ទីមនុស្សដោយខុសច្បាប់ ក្នុងពេល ដែលរាជរដ្ឋាភិបាល បាននិងកំពុងបន្តអនុវត្តនូវផែនការ យុទ្ធនាការប្រយុទ្ធប្រឆាំងល្បែងស៊ីសងខុសច្បាប់ និងការរឹតបន្តឹងការអនុវត្ត​ច្បាប់ស្ដីពី ការបង្ក្រាបអំពើជួញដូរ មនុស្ស និងអំពើធ្វើអាជីវកម្មផ្លូវភេទ ដើម្បីការពារសិទ្ធិ និងសេចក្តីថ្លៃថ្នូររបស់​មនុស្ស យើងលើកកម្ពស់ទំនៀមទម្លាប់ ប្រពៃណីដ៏ល្អរបស់ជាតិ។

ឯកឧត្តមរដ្ឋមន្ត្រី បានសង្កត់ធ្ងន់ថា ដើម្បីបង្កើន និងអនុវត្តតាមការប្តេជ្ញាចិត្តដ៏ខ្ពង់ខ្ពស់ របស់ សម្តេចអគ្គមហាសេនាបតីតេជោ ហ៊ុន សែន នាយក រដ្ឋមន្ត្រីនៃព្រះរាជាណាចក្រកម្ពុជា នៅក្នុងពិធីបើកវេទិកា ជាតិអន្តរសាសនាប្រឆាំងការជួញដូរមនុស្សឆ្នាំ២០២២ ក្រោមប្រធានបទ "សូមកុំយកកម្ពុជា ជាគោលដៅប្រព្រឹត្ត អំពើជួញដូរមនុស្ស ព្រមទាំងបានប្រកាសដាក់វេទិកា អន្តរសាសនា ប្រឆាំងការជួញដូរមនុស្សនេះ ជា "ទិវាជាតិ អន្តរសាសនាប្រឆាំងការជួញដូរមនុស្ស ដោយកំណត់ យកថ្ងៃទី២០ ខែសីហា រៀងរាល់ឆ្នាំ ជាថ្ងៃប្រារព្ធពិធីនេះត រៀងទៅ ដែលវេទិកានេះបានប្រព្រឹត្តទៅ នាថ្ងៃទី២៩ ខែកញ្ញា ឆ្នាំ២០២២ នៅមជ្ឈមណ្ឌលសន្និបាត និងពិព័រណ៍ អន្តរជាតិជ្រោយចង្វារកន្លងទៅ។ សម្តេចតេជោ នាយករដ្ឋមន្ត្រី ក៏បានអំពាវនាវផងដែរ ដល់គ្រប់និកាយសាសនា​ទាំងអស់ ដែលមានឆន្ទៈចូលរួមក្នុងកម្មវិធីនេះ ទទួលយកចំណេះដឹង និងអនុសាសន៍ ទាំងឡាយ ទៅផ្សព្វផ្សាយដល់​បព្វជិត និងសាវ័កជាសាសនិករបស់ខ្លួន ឱ្យបានជ្រួតជ្រាបកាន់តែច្បាស់អំពី អត្ថន័យនៃវេទិកាអន្តរសាសនា​ប្រឆាំងការជួញដូរមនុស្ស នៅកម្ពុជា ដែលមានចរិតជាការរួមសាមគ្គីសហការដោយ ឥតរើសអើងពណ៌សម្បុរ ជំនឿសាសនា ក្នុងគោលបំណងតែមួយគត់ គឺភាពសុខក្សេមក្សាន្ត និងការរីកចម្រើនរបស់ ពលរដ្ឋ និងប្រទេសជាតិយើង៕ ដោយ ៖ រដ្ឋា