ព្រះសីហនុ៖ លោក តេង វណ្ណឌី ប្រធានគណៈកម្មការរៀបចំការបោះឆ្នោតខេត្តព្រះសីហនុ បានឲ្យដឹងថា មកទល់ពេលនេះមានប្រជាពលរដ្ឋជាង ១២ម៉ឺននាក់​មានឈ្មោះក្នុងបញ្ជីបានទទួលប័ណ្ណព័ត៌មានអ្នកបោះឆ្នោត។

បើតាម លោក តេង វណ្ណឌី បានប្រាប់ BTV News ឲ្យដឹងនៅថ្ងៃទី២១ ខែមិថុនានេះថា ក្នុងដំណើរ​ឆ្ពោះទៅរកការបោះឆ្នោតជ្រើសតាំងតំណាងរាស្រ្ត ​នីតិកាលទី៧ គណៈកម្មការរៀបចំការ​បោះឆ្នោត​ខេត្តព្រះសីហនុ បានអនុវត្តទៅតាមប្រតិទិន ជាពិសេសក្នុងពេលបច្ចុប្បន្ន​កំពុងអនុវត្តការចុះ​ចែក​ប័ណ្ណ​ព័ត៌មាន​អ្នកបោះឆ្នោតជូនប្រជាពលរដ្ឋមានឈ្មោះក្នុងបញ្ជី ដើម្បីឲ្យពួកគាត់ទទួលបានព័ត៌មាន​របស់ខ្លួន និងទីតាំងការិយាល័យបោះឆ្នោតជាដើម។

លោក បន្តថា គិតចាប់ថ្ងៃចាប់ផ្តើមចែកប័ណ្ណព័ត៌មានអ្នកបោះឆ្នោត មកទល់ពេលនេះមាន​ប្រជាពលរដ្ឋ​ក្នុងបញ្ជីទទួលបានជាង ១២ម៉ឺននាក់ ក្នុងចំណោមប្រជាពលរដ្ឋ​មានឈ្មោះក្នុងបញ្ជីជិត១៥ម៉ឺននាក់។

ប្រធានគណៈកម្មការរៀបចំការបោះឆ្នោតខេត្តព្រះសីហនុរូបនេះ បញ្ជាក់ថា ការចែកប័ណ្ណព័ត៌មាន​អ្នកបោះឆ្នោតនឹងបញ្ចប់ នាថ្ងៃទី២៦ មិថុនានេះ ប៉ុន្តែក្នុងករណីប្រជាពលរដ្ឋពុំទាន់ទទួលបានអាច​អញ្ជើញ​ទៅទទួលប័ណ្ណព័ត៌មាននេះតាមគណៈកម្នការឃុំ-សង្កាត់រៀបចំការបោះឆ្នោតពីថ្ងៃទី២៦ រហូតដល់ថ្ងៃទី២១ ខែកក្កដាខាងមុខ។

ការបោះឆ្នោតជ្រើសតាំងតំណាងរាស្រ្តក្នុងអាណ្ណតិនេះ នឹងប្រព្រឹត្តទៅនាថ្ងៃទី២៣ ខែកក្កដាខាងមុខ និងមានប្រជាពលរដ្ឋមានឈ្មោះក្នុងបញ្ជីនៅទូទាំងប្រទេសសរុបជាង ៩លាន៧សែននាក់ ដែល​នឹងត្រៀមអញ្ជើញទៅបោះឆ្នោតនៅទីតាំងការិយាល័យចំនួនជាង២ម៉ឺន ការិយាល័យបោះឆ្នោតនៅទូទាំងប្រទេស៕អត្ថបទ សេក ឧត្តម